Хулгай луйврын илрүүлэг болсон Хөгжлийн банкны асуудал яван явсаар өрсөлдөгчдөө замаасаа зайлуулах гэсэн үргээлэг болж хувирав уу.
Анхандаа улстөрд нөлөө бүхий 30-аад хүний асуудал яригдаж байсан ч, эцэстээ Н.Алтанхуяг, Г.Амартүвшин, Х.Ганхуяг нарын дөрөвхөн хүнээр туг тахиад өнгөрөх нь гэсэн хардлага, эргэлзээ олон нийтэд төрж байна. Тэдний нэг нь Хөгжлийн банкны чанаргүй зээлдэгчийн нэг "НВЦ" компанийн захирал Ц.Баатарбилэгээс хахууль авсан асуудлаар шалгагдаж буй УИХ-ын гишүүн Ё.Баатарбилэг.
Хэдэн сарын турш яригдсан хүмүүсийн дунд түүний нэр гэнэт, шинээр орж ирсэн нь дээрх эргэлзээг улам лавшруулж байгаа юм. Тэгэхээр Хөгжлийн банкны кампаант ажил нь “60 тэрбумын хэрэг” гэдэг шиг сонгууль угтсан ээлжит дуулиан болох бололтой. МАН-ын өнөөгийн удирдлагуудын үйл хөдлөгөөн хэдийнэ 2024 оны сонгуулийг чиглэж, нэр дэвших хүмүүсээрээ шатар нүүж эхэлжээ.
Нэгдүгээрт “Миеэгийн фракц”-ыг улстөрөөс шахан гаргахын тулд Ж.Эрдэнэбатын Засгийн газрыг дэмжиж байсан нөхдийг, хоёрдугаарт АН-ыг хүчтэй сөрөг хүчин болгон өндийлгөхгүйн тулд Женкод холбоотой бүхнийг шахан зайлуулах арга хэрэгсэл нь “Хөгжлийн банк” болоод явчихав. Яг энэ хоёр шалтагт яв цав нийцэж буй хүн нь Ё.Баатарбилэг юм.
Тэрбээр Ж.Эрдэнэбатын Засгийн газрыг дэмжиж байсан 32-ын нэг гэдгийг улстөрд ойрхон хүмүүс андахгүй. Тэр асуудлаас болж, өнөөгийн ЗГХЭГ-ын дарга Ц.Нямдоржтой “түр тар” хийгээд авсныг нь ч санаж байгаа байх. Тэгвэл Женко-той яагаад холбогдов. Ё.Баатарбилэгийн олон жилийн найз Ц.Баатарбилэг гэгч 2017 оны Ерөнхийлөгчийн сонгуульд Х.Баттулгыг дэмжиж, хандив өгсөн байдаг юм. Зүгээр л шалтаг. МАН-ынхан өөрсдөдөө хариуцлага тооцож чаддаг сүрхий улс болж харагдангаа Женкод шанаа өгч буй явдал. Ингээд харвал Ё.Баатарбилэг яахын аргагүй улстөрийн золиос. Ногоон малгайтнуудын гараас амь мултарсан ламын оронд хонь хариулж явсан хүнийг барьж, тоог нь гүйцээж явсан түүх давтагдах вий.
