Хөгжлийн банкны хэрэгт холбогдогчдын нэрсийг сонсоод нэг улирал дуусах гэж байна. Улсын ерөнхий прокуророос УИХ-ын дөрвөн гишүүний бүрэн эрхийг түдгэлзүүлэх саналыг УИХ-ын дарга Г.Занданшатарт хүргүүлсний дотор УИХ-ын гишүүн Ё.Баатарбилэг багтсан нь хэвлэлийнхний сонирхлыг татаад байгаа юм.
Уг нь овоо нэр цэвэр, үг цэгц явсан төдийгүй Боловсрол, соёл, шинжлэх ухаан, спортын сайдаар муугүй ажилласных нь хувьд тоож байсан байх. МАН-ын “бүдүүн бүлэг” 2016-2020 онд Засгаа унагаж, сайдуудаа сэлгэж байж, арай гэж бүрэн эрхээ барсан. Боловсролын салбарт л гэхэд 4 жилд 4 сайд сольсон.
Анхнаасаа энийгээ тавьчихгүй дээ, арай л богино ажиллалаа гэсэн үнэлгээтэй тамгаа өгсөн нь Ё.Баатарбилэг. 2019 онд ганцхан жилийн настай томилогдож, 2020 онд ажлаа өгөхөө мэдэж байсан ч салбартаа хоноцын сэтгэлээр хандаагүй болохоор тэгдэг биз. Тэрээр салбарын сайдаар очсон даруйдаа яаманд төвлөрсөн төсвийн эрх мэдлийг задалсан.
Сургууль, цэцэрлэгийн төсвийн эрх мэдлийг аймаг, нийслэл, дүүргийнх нь боловсролын газар руу шилжүүлсэн гэж салбарынхан нь ярьдаг. Тендер аваад гацаадаг компаниудыг хар жагсаалтад оруулна гэдгээ мэдэгдэж, сургууль, цэцэрлэгийн шинэ барилгуудыг яамныхаа албан хаагч бүрд нэгбүрчлэн хуваарилан хариуцуулж, шахаж ажилласны хүчинд олон зуун барилга ашиглалтад орж, гурван ээлжийг халж чадсан байдаг.
Сурах бичгийн хүрэлцээгүй байдал, дамлан шаглагчдын бизнесийг тас цохиж, түрээсийн сурах бичигтэй болгосон нь одоо ч үргэлжилж байна. Бас олон жил шүүмжлэл дагуулсан сургалтын хөтөлбөрт анх удаа сайжруулалт хийсэн, “Иргэний боловсрол” хичээлийг “Монгол ёс, хүмүүжил” болгон агуулга, хөтөлбөрийг нь бүрэн шинэчилж, заавал судалдаг хичээл болгосон гээд олон ажлыг тэр эхлүүлсэн.
Ё.Баатарбилэг зөвхөн Боловсролын сайд байгаагүй. Соёл, шинжлэх ухааны салбарт ч салхи савир оруулж чадсан гэгддэг. 7-8 жил түгжиж орхисон Байгалийн түүхийн музейн зориулалтын бус барилгыг улстөржилт, эсэргүүцэл дунд зориг гарган буулгуулж, оронд нь “Чингис хаан музей”-н барилгыг богино хугацаанд босгуулж чадсан.
Өнгөрөгч онд 100 жилийн ойгоо тэмдэглэсэн Монголын шинжлэх ухааны салбар түүхэндээ анх удаа чуулган хийж, хот, хөдөөгийн эрдэмтэн, судлаачдынхаа үгийг сонссон нь Ё.Баатарбилэгийг сайд байх хугацаанд л хамаардаг юм билээ. Түүний хувь заяаг одоо намын нөхөд нь шийднэ. Эхлээд Халдашгүй байдлын дэд хороо, дараа нь Төрийн байгуулалтын байнгын хороо, эцэст нь УИХ-ын нөхөд нь хэлэлцэнэ.
Ц.Батхуяг
