Ц.Анандбазарт УИХ-ын бүрэн эрх “бүрэн” үйлчилж байна

Өнгөрөгч хоёрдугаар сард Ерөнхий сайд Л.Оюун-Эрдэнэ Хөгжлийн банкны чанаргүй зээлийн асуудлаар байр сууриа илэрхийлэхдээ, улс төрийн нөлөөлөл ашиглаж зээл аваад, зориулалтын бусаар өөр зүйлд зарцуулсан нөхдөд Засгийн газар хуулийн дагуу хатуу арга хэмжээ авна. Хөгжлийн банкийг байгуулагдсан цагаас хойших бүх хэргийг Эрүүгийн хуулийн дагуу мөнгө угаах хэргээр шалгаж өгөх хүсэлтийг Улсын Ерөнхий прокурорт гаргаснаа мэдэгдэж байсан. Энэ үеэр Ерөнхий сайд “Зээл зөрчигдсөн гэдэг асуудлаар ихэнх нь иргэний хуулиар, мөн хөөн хэлэлцэх хугацаа дууссан гэдэг асуудлаар бондын зарцуулалт дууссан гэдэг агуулгаар бондын үеэр зээл авсан албан тушаалтнууд мултарч үлдэх асуудал байна. Тиймээс зүйлчлэлийг өөрчлөөд мөнгө угаах байдлаар шамшигдуулсан, татвар төлөгчдөд ноцтой хохирол учруулсан гэдгээр УЕПГ оролцож, төрийг хохиролгүй болгох ийм бичиг өгсөн” хэмээж байв. Ерөнхий сайдыг мэдээлэл хийх үеэр зарим эх сурвалжууд “Эрэл”-ийн Б.Эрдэнэбат, УИХ-ын гишүүн, “Сод Монгол”-ын Ц.Анандбазар, “Алтай” констракшны Х.Бат-Эрдэнэ, Худалдаа хөгжлийн банкны “Сахал” Д.Эрдэнэбилэг нарын олон хүний нэрийг дурдаж байсан. Үүний дагуу Прокурорын газраас зээл авахад нөлөөлсөн, дэмжсэн эрх мэдэлтнүүдийг шалгаж байгаа байх гэдэгт ч олон түмэн найдаж байна.

Энэ үеэр нэр нь дурдагдаж байсан эрхмүүдээс Б.Эрдэнэбат долоон жилийн ял аваад эдэлж байгаа бол “Алтай” констракшны Х.Бат-Эрдэнэ, Худалдаа хөгжлийн банкны “Сахал” Д.Эрдэнэбилэг нарыг цагдан хорьж шалгаж байгаа. Харин УИХ-ын гишүүн Ц.Анандбазар чуулганы хуралдаандаа сууж харагдах юм.

Түүний хувьд “Сод Монгол” группын нэр дээрээс 2017 онд Хөгжлийн банкнаас 43 сая ам.долларын зээлийг хоёр удаагийн хэсэгчилсэн байдлаар авсан гэдэг. Гэвч Хөгжлийн банкнаас авсан 43 сая ам.долларыг “зориулалтын бус зүйлд ашигласан” нь 2019 онд Хөгжлийн банкинд хийсэн шалгалтаар тогтоогдсон гэдгийг эх сурвалжууд хэлдэг. Харин Ц.Анандбазар Хөгжлийн банкны чанаргүй зээлийн асуудал сөхөгдөхтэй зэрэгцэн яаран сандран зээлээ өгч, төлбөр тооцоогоо барагдуулсан гэдгийг ч хэвлэлүүд онцолж байсан.

Хамгийн гол нь авсан зээлээ зориулалтын бусаар ашигласан түүнийг яагаад шалгахгүй байна вэ гэдэг нь анхаарал татна. УИХ-ын гишүүний бүрэн эрх гэдэг зүйлээр халхавч хийж байгаа бол сая УИХ-ын гишүүн Н.Алтанхуяг, Г.Амартүвшин, Ё.Баатарбилэг нарын хамт нэрийг нь Прокуророос оруулж ирэх ёстой гэх ч хүн байна. Уг нь авсан зээлээ зориулалтын бусаар ашигласан, “мөнгө угаах” хэргээр Б.Эрдэнэбат ял эдэлж байна, зарим нь хоригдож байхад “бүрэн эрх” хэмээх хөшигний ард сугарч үлдээд байна уу гэх хардлага хаа хаанаа байна.

Түүний хувьд дурдаад байвал олон зүйл бий. Тухайлбал, Ц.Анандбазар гишүүнд хүчирхийлүүлсэн гэх иргэн Б.Сүндэръяа " Ц.Анандбазар гишүүнтэй 2019 онд танилцсан. Түүнээс өмнө манай найзаар дамжуулан надтай уулзуулж өгөхийг удаа дараа хүссэн. Тэр бүрт нь татгалздаг байв. Энэ өргөдлийг өгөөд зогсохгүй, цаашид ч олон өргөдөл өгнө. Тэр бүрийг олон нийтэд зарлах боломжгүй байгаа тул хуулийн байгууллагад хандсан өргөдөл дээрээ тодорхой бичсэн. УИХ-ын Ц.Анандбазар гишүүнтэй холбоотойгоор надтай 1,000 гаруй эмэгтэй холбогдсон. Ийм зүйлийг огт төсөөлөөгүй байсан” хэмээж байсан. Тэгвэл энэ хэрэг өнөөдөр нам жим болсон. Түүнийг УИХ-ын гишүүн болсноос хойш ийнхүү хоёр ч том асуудал дэгдсэн ч чимээгүй өнгөрч байгаагийн цаана өнөөх л “УИХ-ын гишүүний бүрэн эрх” гэх зүйл үйлчлээд байна уу. Түүний хувьд УИХ-ын гишүүний бүрэн эрхийг ёстой л “бүрэн” эдэлж байна даа.

Tumen.mn

НАЛУУ-УХАА ТӨСӨЛ ДЭЭР SATHY КОМПАНИТАЙ ХАМТРАН АЖИЛЛАНА
Монгол Улсын Ерөнхийлөгч У.Хүрэлсүх Сувилахуйн салбарынханд баярын мэндчилгээ дэвшүүлэв
Сэтгэгдэл (1)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!
  1. иргэн

    Энэ нөхрийг дийлэхгүй эээ Мөнгө хүчтэй шүү дэ