Монголын Үндэсний Олон Нийтийн Радио, Телевиз бол ард иргэдийн татварын мөнгөөр санхүүждэг, иргэд олон нийтээс хураамж авдаг байгууллага. Тиймээс тус байгууллага улсын төсвөөс авсан санхүүжилтээ хэрхэн яаж зарцуулж байна вэ гэдэг нь хэн хүнд хамаатай сэдэв юм.
Тэгвэл Монголын Үндэсний Олон Нийтийн Радио, Телевизийн 2017-2020 оны улсын төсвийн санхүүжилтийн хэрэгжилт, үр нөлөөний талаарх Үндэсний аудитын газраас гүйцэтгэсэн аудитын тайлангаас үзэхэд анхаарал татсан тоон мэдээллүүд байгааг тодотгоё.
Тухайлбал, Урамшуулал олгох журмуудын зохицуулалттай холбоотой дараах асуудлууд байна.
- Үндэсний зөвлөлийн 2020 оны 05 дугаар тогтоолоор үндэсний зөвлөлийн 1 гишүүнд сард олгох урамшууллын хэмжээг 500.0 мянган төгрөгөөр нэмэгдүүлж, 1.200.0 мянган төгрөгөөр тогтоосноос шалтгаалан, үндэсний зөвлөлийн гишүүдэд олгох урамшууллын төсвийг 2020 онд 67.5 сая төгрөг хэтрүүлэн олгосон
- Захирлын зөвлөлийн 13-15 гишүүдэд 2018-2020 онд уран бүтээлийн 172.6 сая, төсөл хөтөлбөрийн 62.0 сая, чанарын 167.5 сая нийт 402.2 сая төгрөгийн урамшууллыг давхардуулан олгосон.
- Маркетингийн менежерийн ажлын байрны тодорхойлолтод байгууллагад шаардлагатай санхүүжилтийн эх үүсвэрийг олох чиглэлд идэвх санаачилгатай ажиллах үндсэн чиг үүрэгтэй гэж заасан байтал МҮОНРТ-ийн захирлын 2017 оны А/79 дүгээр тушаалаар баталсан Маркетингийн менежерүүдийн ажлын чанарыг үнэлэх, урамшуулал олгох журмаар 2018- 2020 онд маркетингийн 2-4 менежерт нийт 97.5 сая төгрөгийн урамшуулал олгосон
- МҮОНРТ-ийн захирлын 2010 оны 374 дүгээр тушаалаар баталсан Цалин хөлсний журам, 2019 оны А/12 дугаар тушаалаар Цалин хөлсний журамд оруулсан өөрчлөлтөөр цалин болон ур чадварын нэмэгдэл орсон дүнгээс ажлын гүйцэтгэлийн үр дүнгийн нэмэгдлийг 20.0 хүртэл хувиар бодож олгохоор заасны дагуу нэмэгдэл орсон дүнгээс гүйцэтгэлийн үр дүн бодож 339.3 сая төгрөг давхардуулж олгосон нь Нийгмийн хамгаалал хөдөлмөрийн сайдын 2005 оны 55 дугаар тушаалаар баталсан Дундаж цалин хөлс тодорхойлох журмын 3.”в/нэмэгдэл гэж ажилтан, албан хаагчийг хэвийн бус нөхцөлтэй ажлын байранд болон ердийнхөөс илүү өндөр үүрэг хариуцлага хүлээлгэн ажиллуулсан, эсхүл мэргэжлийн өндөр ур чадвар, ажлын дадлага, туршлагыг нь ашигласны төлөө ажил олгогчоос үндсэн цалин дээр нь нэмж төлж буй хөлсийг хэлнэ” гэсэн заалттай нийцэхгүй байна.
- МҮОНРТ-ын цалин хөлс, урамшуулал олгоход мөрдөж байгаа журмуудыг боловсронгуй болгож санхүү, хүний нөөцийг оновчтой төлөвлөн, зохион байгуулж, нөөцийг үр ашигтай удирдах шаардлагатай байна.
МҮОНРТ-ийн 2018-2020 онд олон нийтийн өмчөөс нийт 615.7 сая төгрөгийн хөрөнгийг үр ашиггүй зарцуулсан байна гэж аудитын тайланд дүгнэжээ. Тухайлбал:
- Шүүхийн шийдвэрээр ажлаас халагдсан ажилтанд 44.2 сая төгрөгийн цалин хөлс, нийгмийн даатгалын шимтгэлийг нөхөн олгосон;
- Шинэ жилийн арга хэмжээ зохион байгуулахад 143.4 сая төгрөг;
- Байгууллагын үйл ажиллагааны тайлан хэвлүүлэхэд 143.7 сая төгрөг;
- МҮОНРТ-ийн болон бусад хэлтсийн ойн баярыг тэмдэглэн өнгөрүүлэхэд 229.2 сая төгрөг;
Хуулийн зөвлөх үйлчилгээ авахад 55.2 сая төгрөг тус тус зарцуулсан нь олон нийтийн өмчөөс үр ашиггүй зарцуулсан зардал болсон гэж Үндэсний аудитын газраас гүйцэтгэсэн тайланд тодотгосон байна.
Tumen.mn
