Манай улсад Ковид-19 өвчний халдвар голомтлон тархаж эхэлсэнтэй зэрэгцэн хөл хорио хязгаарлалтын арга хэмжээнүүд авах зайлшгүй шаардлага үүсэж байсныг хаа хаанаа мэдэж буй. Түүнчлэн тухайн үед хүүхэд, залуус сургууль цэцэрлэгийн талбайд нэвтрэн орох, бөөнөөрөө нэг дор цуглах зэрэг нь бодит эрсдэлтэй байсан.

Харин одоогийн нөхцөл байдлыг аваад үзэхэд, Монгол Улс ковид цар тахлын эрсдэлт нөхцөл байдлыг амжилттай даван туулж, хүн амаа дархлаажуулалтад өндөр хувьтай хамруулж чадсан улс орнуудын нэгээр тодроод буй.

Түүнчлэн энэ үед нийгмийг хамарсан элдэв хориг хязгаарлалтын арга хэмжээг авахгүй байх, иргэдийн ажиллаж, хөдөлмөрлөх, амар тайван амьдрах эрхэнд халдахгүй байх шаардлагатай гэсэн байр суурийг Нийслэлийн удирдлагуудын зүгээс баримтлаж буйгаа өмнө нь удаа дараа мэдэгдэж байсан билээ.

Гэтэл Хүүхдийн эрхийг хамгаалах баярын өдрөөр боловсролын байгууллага нь өөрөө хүүхдүүдийн эрхийг зөрчсөн үйлдэл гарсан нь олон нийтийн цахим сүлжээгээр олонд ил болсон билээ. Тухайлбал, Нийслэлийн 41-р сургуулийн гадаад сагсны талбайд сагс тоглож байсан хүүхдүүдийг тус сургуулийн жижүүр хөөж туун, хүүхэд багачууд тоглох эрхтэй талбайг гаднаас нь түгжиж цоожилсон асуудал гарсан юм. Гол нь энэ бол зөвхөн 41-р сургуульд болоод өнгөрсөн нэг л асуудал биш бөгөөд нийслэлийн хэмжээнд бусад сургуулиудын орчинд ч нийтлэг ажиглагдаж буй асуудал болохыг олон нийтийн сүлжээнд байр сууриа илэрхийлсэн иргэд хэлцгээж байгаа юм.

Улс нийтээрээ амаргүй цар тахлын эрсдэлт хүнд үеийг даван туулж, одоо л нэг иргэд хэвийн амьдралдаа шилжин амьдрах нөхцөл бүрдээд байгаа энэ үед хүүхэд багачууд өөрсдийнхөө сурдаг сургуулийн гадаах талбайд чөлөөт цагаа өнгөрөөхийг хорьж цагдаад байх нь утгагүй зүйл л дээ.

Түүнчлэн хүүхэд залуусын энэ эрхийг хүлээн зөвшөөрч, тэдэнд тээг саад учруулахгүй байх ёстой талаар нийслэлийн Засаг даргын орлогч З.Төмөртөмөө байр сууриа илэрхийлснийг хүргэе. Тэрбээр “Гадаах сагсны талбай, хөлбөмбөмбөгийн талбай бол үзмэр биш. Хүүхдүүд чөлөөтэй тоглох л ёстой. Бүх сургуулийн удирдлагуудад мэдэгдэл хүргүүлнэ. Хэрэв ийм үйлдэл олон давтагдвал хариуцлага ярихаас өөр сонголтгүй болно. Уг нь захиргааны аргаар бус шийдэх бус, сургууль, цэцэрлэгийн удирдлагуудын хандлагын өөрчлөлт хийхэд л шийдэгдэх асуудал шүү дээ” гэснийг тодотгоё.

Үнэхээр ч энэ бол цэвэр ХАНДЛАГЫН л асуудал баймаар. Эрсдэлт өвчний нөхцөл байдал арилж, энх цагт ирчихээд байхад, сургууль, цэцэрлэгийн жижүүрүүд, дарга удирдлагууд бүгдээрээ л хандлагаа өөрчилж, хүүхэд багачуудынхаа ая таатай байх, чөлөөт цагаа зөв боловсон өнгөрөөх боломжид анхаармаар байх юм. Тоглоомын талбайгаас хөөгдсөн багачууд хаашаа очих вэ? гэдгийг тэдгээр нөхдүүд өөр өөрсдөдөө тавьж үзэх шаардлагатай байна.

Tumen.mn