Засгийн газрын ээлжит хуралдаан 2022 оны гуравдугаар сарын 23-нд болж, 2015-2016 онд хувьчлах, өөрчлөн байгуулах төрийн өмчит болон төрийн өмчийн оролцоотой хуулийн этгээдийн жагсаалт батлах тухай Засгийн газрын 2015 оны наймдугаар сарын 17-ны өдрийн 330 дугаар тогтоолын хавсралтаар баталсан 2015-2016 онд хувьчлах, өөрчлөн байгуулах төрийн өмчит хуулийн этгээдийн жагсаалтын 15 дугаар хэсэгт дурдсан “Хөтөлийн цемент шохой” ТӨХК-тай холбогдолтой заалтыг бүхэлд нь хүчингүй болгон, уг үйлдвэрийг төрд буцаан авсан билээ.
Үйлдвэрийн захирлаар эдийн засагч Л.Наранбаатарыг томилсон.Тэрээр АН-ын гишүүн байхдаа УИХ-ын дарга, АН-ын дарга З.Энхболд руу оймс шидэж, анх олны танил болж байсан тэрээр сонгууль бүрээр Х.Баттулга, З.Энхболд нар луу ээлжлэн дайрсаар, эцэст нь МАН-ын гишүүн болсон юм. МАН-д орсоноос хойшхи анхны албан тушаал нь энэ байлаа.
Олны нийтийн дунд бол түүнийг харьцангуй либерал үзэлтэй, чөлөөт зах зээлийг дэмжигч мэт харагддаг байсан тул Хөтөлийн захирлаар бас ч гэж гайгүй ажиллачихаж мэднэ гэсэн хүлээлт байсан нь нууц биш.Харамсалтай нь сошиал медиагаар сонирхогчийн шинжтэй пиар хийхээс өөр чадах зүйл түүнд бага байжээ гэдгийг бодит байдал харуулж байна. Тодруулбал ид бүтээн байгуулалт өрнөх ёстой энэ үед цемент хомсдож, үнэ нь 30 хувь нэмэгдээд байгаа билээ.
Нөгөөтэйгүүр төр оролцсон бүхэн доголдож, асуудал үүсдэгийн хамгийн сүүлийн жишээ энэ болж байна.
С.Сарнай
