Хүнс, хөдөө аж ахуй, хөнгөн үйлдвэрийн яамыг хүнс, хөдөө аж ахуйн салбарт томоохон бизнес эрхэлж байсан, ашиг сонирхлын зөрчилтэй, агрономич Х.Болорчулуун удирдахаар боллоо. Гэтэл дүүгийнхээ дэмжлэгээр яам яам дамжиж, наймааны морь шиг болсон, мэдээллийн технологич Ж.Бат-Эрдэнийг Дэд сайдаар томилов. Энэхүү томилгооноос харахад хүнс, хөдөө аж ахуйн салбараас өнөөх Засгийн газрын хэрэгжүүлэх “Шинэ сэргэлтийн бодлого”-ыг харахын ч хэрэггүй. Хүнс, хөдөө аж ахуй, хөнгөн үйлдвэрийн сайдаар Х.Болорчулууныг томилж байгааг огтхон ч ойлгосонгүй. Юуны өмнө тэр өөрөө хүнсний салбарт бизнес хийдэг улстөрч гэхээр ашиг сонирхлын том зөрчил илэрч байна.

Тодотговол, “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль” гэж бий. Уг нь энэ хуулиа мөрдвөл Х.Болорчулуун сайд болох учиргүй хүн. Түүнд асар том ашиг сонирхлын зөрчил бий. Урьд өмнө бизнес эрхэлж байсан нь хамаагүй байж болох ч түүний Хөрөнгө орлогын мэдүүлэгт “Дорнод” гурил, тэжээлийн үйлдвэрт хувь эзэмшдгийг дурдсан нь бий. Уг хуулийг энгийн байдлаар ойлгуулахад ашиг сонирхлын зөрчлийн тухай ойлголтод төрийн албан тушаалтны хувийн ашиг сонирхол нь төрийн эрх мэдлийг хэрэгжүүлэх албаны чиг үүрэгтэй нь харшлахыг ойлгодог. Үүнээс байнга, бололцооныхоо хэрээр зайлсхийж, өөрийн болон төрийн байгууллагынхаа нэр хүндийг эрсдэлд оруулахгүй байх шаардлага төрийн албан тушаалтнуудад тавигддаг л зүйл. Өөрөөр хэлбэл Х.Болорчулуун салбарын сайдаар томилогдохоос зайлсхийх хэрэгтэй. Ерөнхий сайд, Засгийн газраас санал болгосон ч татгалзах агуулга бүхий эрх зүйн орчинтой зүйл.

Х.Болорчулууны хувьд популизм хийж, засгийн ажилд чөдөр тушаа болдог учраас яах аргагүй сайдаар томиллоо гэж үзье. Бүр дүүрсэн хэрэг гэж бодоход Дэд сайдаар туршлага бүхий салбарын нөхрийг томилсон бол. Гэтэл дүүгийнхээ дэмжлэгээр Зам тээвэр, хөгжлийн Дэд сайдаар ажиллаж байсан Ж.Бат-Эрдэнэ гэх нөхрийг “шагнах” замаар Хүнс, хөдөө аж ахуй, хөнгөн үйлдвэрийн Дэд сайдаар томилсон гэдгийг нуух хэрэггүй. Түүний дүү Ж.Батзандан МАН-д маш том үүрэг гүйцэтгэж, үнэмлэхүй ялалтад хүргэхэд том гавьяа байгуулсан гэдгийг хэвлэлийнхэн онцолдог. Тиймээс дүүгийнхээ гавьяаны өчүүхэн хэсгийг Дэд сайдын албаар ээлжлэн эдлэх болсон нь өдгөө ад үзэгдэх томоохон шалтгаан болоод байна. Ж.Бат-Эрдэнэ Новосибирск хотын Техникийн Улсын Их Сургуулийг "Системийн инженер” мэргэжлээр, ХБНГУ-ын Дортмунд хотын Мэдээллийн технологийн институтийг Мэдээллийн технологийн зөвлөх, удирдлагын ухааны арга зүйч мэргэжлээр, мөн АНУ-д мэдээллийн аюулгүй байдлын шинжээчээр төгссөн хүн. Мэдээллийн технологи талдаа бол тийм ч олон байхгүй мэргэжилтэн гэж болно. Харин замаар бол явж үзсэн байх, өөр юу ч байхгүй. Мах бол иддэг байх, мал гэж мэдэхгүй ийм л хүн. Ажил хөдөлмөрийн гараагаа ч мэдээллийн технологийн чиглэлээр эхлүүлж, үүгээр дагнасан хүн. Гэтэл учрыг нь ч олж амжаагүй замын салбараас нь Хүнс хөдөө аж ахуйн салбар руу өгчихлөө. Бүр ч самарна биз. Тэр ч бүү хэл “Манай Дэд сайд хонь ямаагаа ялгах байгаа даа” гэж хошигнох ч хүн байна. Хөдөө аж ахуй гэдэг бол манай улсын гол салбар, дээр нь хүнс гэхээр нийгмийн амин чухал хэсэг. Анхдагч гэж болох энэ салбар маань зах зээлийн нийгэмд шилжсэн цагаас хойш хөл дээрээ бүрэн тэнцэж чадаагүй өнөөдрийг хүрсэн гэдгийг нуух хэрэггүй. Дотоодод махны үнэ хэдэн төгрөгийн үнэтэй байгааг мэдэх мэдэхгүй нь хамаа алга. Бидний арай гэж эхлүүлэх гэж байгаа махны экспорт юу болох бол. Дээр нь арай гэж амь тээж байгаа хүнсний хэдэн үйлдвэрлэгчдээ яах вэ. Бэлчээрийн даац, малын тоо толгой, эрчимжсэн мал аж ахуй, үр тариа, газар тариалан гээд дурдаад барахгүй олон зүйл энэ салбарт бий. Хамгийн том асуудал гэвэл өдгөө ч шийдлээ олоогүй байгаа Хөнгөн үйлдвэрийн цогцолбор яах вэ. Үүнээс үүдэж малаас гаралтай түүхий эд, бүтээгдэхүүнийг үнэ цэнэтэй болгох тухай асуудал гээд шил шилээ дарсан зүйл байна. Гэтэл ашиг сонирхлын зөрчилтэй сайд, салбараа мэдэхгүй, наймааны морь шиг болсон Дэд сайд томилогдож очихоор юу болох вэ. Өнөөх Засгийн газраас хэрэгжүүлэх “Шинэ сэргэлтийн бодлого” юу болох вэ.