Шударга өрсөлдөөн, хэрэглэгчийн төлөө газарт иргэдээс ирүүлсэн “Юнивишн компани нь хэрэглэгчдэд мэдээлэл өгөлгүй үнэ нэмсэн” гэх гомдлыг хянаад хэрэглэгчдэд хангалттай мэдээлэл өгөөгүй гэх асуудалд нь Зөрчлийн хэрэг нээн шалгаж эхлээд байна. Үнэ тарифаа хянуулаагүй нэмсэн асуудлыг харьяаллын дагуу Харилцаа холбооны зохицуулах хороонд хүргүүлсний хариуд тус хорооноос албан бичиг ирүүллээ.

Уг албан бичигт “Харилцаа холбооны зохицуулах хороогоор хянуулж батлуулаагүй үнэ тарифыг хэрэглэгчдэд мөрдүүлэхгүй байх талаар Юнивишн ХХК-д мэдэгдсэн” гэжээ.

Өрсөлдөөний тухай хуулиар давамгай байдалтай болон зүй ёсны монопол аж ахуйн нэгжүүдэд ШӨХТГ хяналт тавих зохицуулалттай ч 2016 онд хуульд орсон нэмэлт өөрчлөлтөөр зохицуулалттай салбаруудын үнийг тухайн зохицуулах хороод нь өөрөө хянахаар өөрчлөн баталсан байдаг.