АМГТГ-аас өнөөдөр 2022 онд хийж хэрэгжүүлсэн ажлын үр дүнгийн тайлангийн хурлыг зохион байгууллаа. Агентлагийн 2022 оны үйл ажиллагааны тайлан илтгэлийг ТЗУГ-ын дарга Г.Мөнхсайхан хэлэлцүүллээ.
Энэхүү хурлыг нээж АМГТГ-ын дарга Л. Баярмандал төрийн албан хаагчдад хандан хэлсэн үгэндээ Монгол Улсын Их Хурлын 2020 оны 52 дугаар тогтоолоор батлагдсан “Алсын хараа 2050” бодлогын баримт бичгийн 5 дугаар бүлгийн “Засаглал” хэсэгт төрийн албаны ёс зүйн талаар нэгэн чухал заалт орсон нь чадварлаг, ёс зүйтэй төрийн албыг хөгжүүлэх тухай юм. Энэ заалтын гол агуулга нь иргэндээ үйлчилдэг, мэргэшсэн, чадварлаг, ил тод, үр нөлөөтэй, ухаалаг төрийн албыг төлөвшүүлэх бөгөөд энэ зорилтын хүрээнд төрийн албан хаагчдын ёс зүй, сахилга хариуцлагыг дээшлүүлэх, төрийн байгууллагын соёлыг сайжруулах, авлигыг таслан зогсоож, авлигагүй нийгмийг цогцлоон төлөвшүүлэхээр тусгасан. Яагаад өнөөгийн нийгэм, олон нийт төрийн албан хаагчийг ёс зүйн асуудлыг санал болгоод байна, яагаад төрийн албан хаагчаас зөвхөн ёс зүйтэй байхыг шаардаад, хүсээд байна гэвэл бидний ёс зүйгүй үйл ажиллагаа нийгмийн итгэлцлийг алдагдуулдагт л байгаа юм. Төрийн байгууллагын хувийн хэвшил болон төрийн бус, ашгийн бус байгууллагуудаас ялгарах гол онцлог нь олон нийтийн итгэлд суурилан ажилладаг зарчим нь. Иймээс төрийн албанд итгэх итгэлийг нэмэгдүүлэхэд төрийн албаны найдвартай, шуурхай, олон нийтийн төлөө гэх үйлчилгээнүүдээс гадна төрийн албан хаагчийн ёс зүйг чухлаар авч үзэж байгаа олон нийтийн шаардлагын дагуу та бүхнээс иргэд, аж ахуйн нэгжтэй харилцахдаа хандлага харилцаандаа анхаарч, хувь хүний сэтгэл зүйн сөрөг хандлагаа ажлын байран дээр илэрхийлэхгүй байхыг хүсье. Агентлагийн удирдлагын зүгээс төрийн албан хаагчийн үнэт зүйлийн гүйцэтгэлийг удирдлагын түвшинд хэмжих бололцоог бий болгож, төрийн албан хаагчийн бүтээмжид суурилсан арга барилыг нэвтрүүлж, гүйцэтгэлд нь суурилсан цалин урамшууллыг тооцдог арга хэрэгслүүдийг хуулийн хүрээнд хэрэгжүүлж ажиллана гэдгээ онцлов. Дараа нь 2022 онд ажил үйлсээрээ тэргүүлсэн албан хаагчдад төрийн дээд одон медаль болон салбарын шагнал, агентлагийн шилдэг ажилтан цол, өргөмжлөл гардуулав.
