Ковидын карантины үед буюу 2020-2022 онд ажил орлогогүй болсон хүмүүс цахим тоглоомд тэр тусмаа онлайн покерт маш их татагдсан. 44 настай, группт байдаг Б.Г нь үргэлжилсэн үйлдлээр 2020 оны 1-р сарын 10-ны өдрөөс 2020 оны 3-р сарын 30-ны өдрийг хүртэлх хугацаанд иргэн Ц.Оаар дамжуулан түрээслэх замаар хуулиар хориглосон мөрийтэй тоглоомын газар байгуулж, тус газартаа “Б” гэх нэршилтэй сайт буюу мэдээллийн технологийг ашиглан ашиг олох зорилгоор “Т” гэх нэршилтэй үр дүнг нь урьдчилан төсөөлөх боломжгүй, аз туршиж тоглодог мөрийтэй тоглоомыг зохион байгуулан ажиллуулж, нийт 216.000.992 төгрөгийн олжээ. Энэ тухай гэрч Б.О нь “...Б.Г ах “Б” гэсэн сайт ажиллуулж байна, чатанд хариулах ажил хийх үү, өдрийн 50.000 төгрөгийг цалинтай, өдрийн 8 цагаар ажиллана” гэж хэлсэн. Ингээд би хүлээн зөвшөөрөн ажиллахаар болсон. Зарим өдөр ачаалал ихтэй үед шөнийн 02 цаг хүртэл ажилладаг. Б.Г ах “чи түрээслэх байр олчих” гээд би байр олоод түрээсийн гэрээ байгуулсан. Б.Г ах өөрөө тэргэнцэртэй бөгөөд “явж чадахгүй” гээд намайг явуулсан. ...2020 оны 2-р сарын 14-ний өдөр ... тоотыг өөрийн нэр дээр нэг сарын 1.3 сая төгрөгөөр түрээсэлсэн. Түрээсийн мөнгийг нь Б.Г өгсөн. Б.Г “уг тоглоомыг хууль бус юм байна” гээд үйл ажиллагаа явуулахаа больсны дараа буюу 10 гаран хоногийн дараа уг байранд цагдаа нар ирсэн...” гэжээ. Ж.О нь “... төрсөн дүү С нь 2020 оны 2-р сарын 20-ны өдрийн орчимд надад “онлайн хэлбэрээр мөрийтэй тоглоом ажиллуулж байгаа, та дансаа ашиглуулаад сарын нэг сая төгрөгийн цалин авах боломжтой” гэж хэлээд намайг Б.Г гэдэг хүнтэй Хан-Уул дүүргийн “Н” гэх нэртэй төв дээр уулзуулсан. Тэгээд Б.Г гэдэг хүнтэй уулзахад “таны ХААН банкны дансыг нэг сарын хугацаатай ашиглаж байгаад өгье” гэж хэлсэн. Тэр үед юунд яаж ашиглах гэж байгаа талаар асуухад “цахим хэлбэрээр мөрийтэй тоглоом зохион байгуулж байгаа, таны данс руу хүмүүсийн мөнгө орж, гарах учир ашиглаад өгнө, харин танд 1.5 сая өгье” гэж хэлээд 2020 оны 3 дугаар сарын 23-ны өдөр нэг сая төгрөгийг өгсөн...” гэжээ. Тэд маш сайн ажилласан агаад зарим өдөрт дансаар нь 50-60 сая төгрөгийн гүйлгээ хийгдэж байсан гэнэ. Харин Б.Г онлайн покерийг хууль бус болохыг мэдээд үйл ажиллагаагаа зогсоосоны дараахан баригджээ. Тэрээр нийтдээ 216 сая төгрөгийн ашиг олсоноос 178 саяыг нь ээжийнхээ дансанд үлдсэнийг нь өөрийн дансанд хадгалж байжээ. Шүүхийн шийдвэрээр уг орлогыг хууль бус хэмээн үзэж данснаас нь албадан гаргуулж улсын орлого болгосон. Мөн Б.Г-д хоёр жилийн зорчих эрх хязгаарлах ял оноожээ.