Хууль бусаар мөрдөж мөшгихийг 2015 оны Эрүүгийн хуульд гэмт хэрэг хэмээн шинээр тусгасан юм. Хүний эрх, эрх чөлөө, хувь хүний халдашгүй байдлыг хамгаалах зорилгоор тус хуульд ийм заалт оруулжээ. Учир нь техник, технологийн хөгжил, цахим орчинтой холбоотойгоор бусдыг хууль бусаар мөрдөж мөшгих гэмт хэрэг нэмэгдэж байна. Прокурорын байгууллага сүүлийн 3 жилд ийм 16 хэрэгт яллах дүгнэлт үйлдэж, шүүхэд шилжүүлэн, шийдвэрлүүлжээ. Үүнийг ангилбал:

• 2024 онд 3 хэрэг
• 2025 онд 6 хэрэг
• 2026 оны 1-10 дугаар сард 7 хэрэг

Эрүүгийн хууль 13.12 дугаар зүйл. Хууль бусаар мөрдөж мөшгих

1. Мөрдөн шалгах ажиллагаа явуулах эрхгүй этгээд бусдыг мөрдөн мөшгисөн бол 6 сараас 1 жил хүртэл хугацаагаар зорчих эрхийг хязгаарлах, эсхүл 6 сараас 1 жил хүртэл хугацаагаар хорих ял шийтгэнэ.

2. Эрх бүхий албан тушаалтан ажил үүргээ гүйцэтгэх явцдаа хууль зөрчиж мөрдөн шалгах ажиллагаа явуулсан, хувийн зорилгоор албаны техник хэрэгслийг ашиглан, бусдыг мөрдөж мөшгисөн бол 5400 нэгжээс 27 мянган нэгжтэй тэнцэх хэмжээний төгрөгөөр торгох, эсхүл 1 жилээс 5 жил хүртэл хугацаагаар хорих ял шийтгэнэ.