Түүний нэр “Чингис хаан” банктай олон удаа холбогдож байсан. Учир нь Б.Жавхлан сайдын эхнэр А.Соёлмаа “Чингис хаан” банкны Ерөнхий захирал Б.Батхүүтэй “Ньюгоби гэйт” компанийг хамтарч эзэмшдэг бизнесийн түншүүд гэх мэдээлэл бий. “Чингис хаан” банктай ийнхүү гэр бүлийн хүрээнд түнш учраас даатгалын мөнгөнөөс эхлээд олон зүйлийг тус банкинд байршуулж мөнгө угаадаг байж болзошгүй баримтуудыг УИХ-ын гишүүн Ц.Даваасүрэн удаа дараа дэлгэж байв. Тус банкинд энэ мэт дэмжлэгийг Б.Жавхлан сайд төрийн индэр дээрээс хүргэдэг учраас иргэний үнэмлэхний хуулбар төдий хүсэлтээр хэдэн тэрбум төгрөгийг хамаарал бүхий хүмүүстээ авч өгсөн мэдээлэл ч дэлгэж байсан.
Тэгвэл өнгөрөгч намар хэвлэл мэдээллээр тэнүүчилж байсан баримт олныг сэрдхийлгэнэ. Тодотговол, түүний хамаарал бүхий иргэн Ц.Мөнхчулуун нь 2019 оны наймдугаар сарын 30-ны өдөр “Чингис хаан” банкинд хандаж, “ОХУ-аас дизель түлш “Монисс” ХХК-д нийлүүлэх гэрээ хийсэн. Уг гэрээний урьдчилгаа төлбөр 2019 оны есдүгээр сарын 03-ны өдөр орж ирэх бөгөөд энэ хүртэл хугацаанд ОХУ-д урьдчилгаа төлбөр болох дөрвөн тэрбум найман зуун наян сая /4.880.000.000/ төгрөгийн урьдчилгаа олгож бидэнд туслана уу” хэмээх өргөдөл хүсэлтийг гараар бичээд иргэний үнэмлэхний хуулбарын хамт илгээжээ.
Юуны өмнө банкнаас ихээхэн хэмжээний зээл авах гэж байгаа хүн иргэний үнэмлэхний хуулбараа хүсэлтийн дор хуулбарласан болж, ямар нэг барьцаагүйгээр авчихдаг гэнэ. Ёстой л эрх мэдлийн дээд түвшинд үйлчилж байгаа хэрэг байх. Мөн түүний хамаарал бүхий Г.Баасанжаргал нь 2019 оны наймдугаар сарын 28-ны өдөр иргэн Ц.Мөнхчулууны адил дөрвөн тэрбум нэг зуун далан сая /4.170.000.000/ төгрөгийг “Чингис хаан” банкнаас дансаар бус бэлнээр авсан байх магадлал бүхий хүсэлт байгаа. Ингэхдээ “Миний бие “Говь” ХХК-д самнасан ноолуур нийлүүлэхээр тохиролцсон. 2019 оны есдүгээр сарын 10-ны дотор бараагаа нийлүүлэхэд санхүүжилт шаардлагатай болсон тул 4.170.000.000 төгрөгийн урьдчилгаа олгож бидний ажилд туслалцаа үзүүлнэ үү” гэсэн хүсэлт мөн иргэний үнэмлэхний хуулбарын хамт илгээжээ. Шинэ бүлэглэлийн гишүүн Б.Жавхлан ийм л хүчтэй байна. Өөрөөр хэлбэл хууль, банкны дүрэм журмын дагуу бус их хэмжээний бэлэн мөнгө зээл нэрээр гаргахад Б.Жавхлан сайд нөлөөлсөн гэж үзэх үндэслэл байна.
Tumen.mn
