“Татвар төлөгчдийн долоо хоног”-ийг энэ жил “Цахимаар үйлчлүүлье” уриан дор зохион байгуулж байна.

Энэ хүрээнд 2022 оны шилдэг татвар төлөгч ААН-үүдийг алдаршуулан зарлахаар Татварын ерөнхий газраас хэвлэлийн бага хурал хийлээ. Энэ үеэр тус газрын дарга Б.Заяабал мэдээлэл өгсөн юм.

Тэрбээр татварын алба нь дотоод болон гадаад үйл ажиллагаандаа хэд хэдэн шинэчлэл хийсэн талаар дурдав.

Дотоод шинэчлэлд: ААН-үүдийг “Том”, “Дунд”, “Жижиг”, “Бичил” гэсэн дөрвөн сегментэд хуваасан. Ингэснээр “Эрдэнэт үйлдвэр” болон цайны газар ажиллуулж буй ААН-үүдэд нэг шаардлага тавьдаг байдлыг залруулсан.

Гадаад шинэчлэлд: Татвал төлөгч иргэн, ААН-үүдийн харилцааг 100 хувь цахимжуулсан зэргийг тайлбарлалаа.

Мөн 2023 онд үргэлжлүүлэн хийж хэрэгжүүлэхээр төлөвлөсөн ажлуудад:

• Татвар төлөгчийн эрсдэлийн үнэлгээ өмнө нь нууцын зэрэглэлд байсныг гаргасан бөгөөд улмаар татвар төлөгч үнэлгээгээ өөрөө харж, шалгалтад орохын өмнө тайлангаа үнэн зөв ирүүлэх боломжийг бий болгоно
• Зээлжих зэрэглэл гэдэг ойлголтын адил үнэлгээ гаргасан. Татварын албанд учрах процессын буюу захиргааны зардлыг бууруулахад хариуцлагатай үйл ажиллагаагаар хувь нэмрээ оруулдаг ААН-үүдэд сегмент тус бүрд нь A-D хүртэл үнэлгээ өгнө.
• Хиймэл оюун ухааны системийг нэвтрүүлэх. Систем өөрөө татвар төлөгчдөд урьдчилж сануулах, мэдээлэл өгч явдаг байхыг зорилтоо болгон ажиллаж байна.
• Нийтийн мэдээллийн ил тод байдлын тухай хууль зэрэг хууль, гэрээ конвенцын үүднээс маш их дата мэдээлэлд ажилладаг. Иймд татварын албаны дата мэдээллийн аюулгүй байдлыг хангах, хамгаалах чиглэлд анхаарах зэргийг дурдлаа.

Татварын ерөнхий газрын дарга Б.Заяабал “Татварын алба 100 хувь цахим болсон. Хувь хүнтэй холбоотой бүх мэдээллийг “Ebarimt” аппликейшнд багтаасан. ААН-үүдийн мэдээллийг “Etax” аппликейшнээр хөгжүүлсэн. Ингэснээр татварын албанд таньдаг хүн хайх шаардлагагүй болсон. Танилын шугамаар асуудлыг шийдсэн ч татварын байцаагч цахим системийн тусламжтай хариуцлага хүлээхээс гарцгүй” гэж онцоллоо.

Татварын ерөнхий газрын төвлөрүүлсэн орлого:

2020 он – 1.5 их наяд

2021 – 7.1 их наяд

2022 – 9.3 их наяд (Төлөвлөгөөг 1.1 их наядаар давуулан биелүүлсэн)

2023 онд 10.1 их наядыг төвлөрүүлэхээр төлөвлөсөн.

Ингээд 2022 оны шилдэг татвар төлөгч 10 ААН-ийг танилцууллаа.

Шилдэг 10 татвар төлөгч ААН-ээр:

1. “Эрдэнэт үйлдвэр” ТӨҮГ – 1.2 их наяд
2. “Эрдэнэс тавантолгой” ХК – 990 тэрбум
3. “Оюу толгой” ХХК – 439.9 тэрбум
4. “Энержи ресурс” ХХК – 289.3 тэрбум
5. “Таван толгой” ХК – 261.1 тэрбум
6. АПУ ХК – 212.1 тэрбум
7. “ХААН банк” ХХК – 197.4 тэрбум
8. “Голомт банк” ХХК – 137.4 тэрбум
9. “Си өү эй эл” ХХК – 104 тэрбум
10. “Цайртминерал” ХХК – 95.6 тэрбум төгрөгийн татвар төлснөөр ийн жагсжээ.