Энэ мэдээ хуучирсан буюу 2023/06/07-нд нийтлэгдсэн мэдээ болно.

“Интерполын шугамаар хайж байсан 92 этгээдээс 45-ыг нь олж, 25-ынх нь байршлыг тогтоосон“

Засгийн газраас хэрэгжүүлж буй "Шувуу ажиллагаа"-ны талаар Хууль Зүй, Дотоод Хэргийн сайд Х.Нямбаатар холбогдох албаныхны хамт өнөөдөр мэдээлэл өглөө.

Интерполын шугамаар "Хөх булант" зар мэдээнд 70, "Улаан булант" зар мэдээнд 22 этгээдийг эрэн сурвалжлуулсан. Зургаадугаар сарын 5-ны өдрийн байдлаар "Улаан булант" зар мэдээнд гурав, "Хөх булант" зар мэдээнд 42 буюу нийт 45 этгээдийг олж тогтоосон болохыг ХЗДХ-ийн сайд Х.Нямбаатар онцлов.

Үргэлжлүүлэн тэрбээр "Авлига, албан тушаалын хэрэгт шалгагдаж байхдаа болон бусад төрлийн гэмт хэрэг үйлдээд мөрдөн шалгах ажиллагааны явцад оргон зайлсан 92 хүний нэрийг зарласан. Шалгалтын хүрээнд 127 болж өссөн бөгөөд тэднийг тасралтгүй эрэн сурвалжилж байна.

Үүнээс өнөөдрийн байдлаар авлига, албан тушаалын болон бусад төрлийн гэмт хэрэг үйлдээд зугтсан таван этгээдийг авчирсан. Сайн дураар хэргээ шийдүүлье гэж 12 хүн ирсэн. Тэдгээрээс дөрвөн этгээдэд холбогдох дөрвөн хэргийг шүүхэд шилжүүлсэн. Нэмж 10 орчим хүнийг авчрахаар бэлтгэл ажлаа хангаж байна.

Интерполоор эрэн сурвалжлагдаж байгаа үлдсэн 47 этгээдээс байгаа газар нь тогтоогдсон 25 хүн байна.

Тухайлбал:

  • Бүгд Найрамдах Казахстан Улсад гурав
  • Бүгд Найрамдах Турк Улсад дөрөв
  • Бүгд Найрамдах Солонгос Улсад зургаа
  • Америкийн Нэгдсэн Улсад нэг
  • Бүгд Найрамдах Франц Улсад нэг
  • Австрали улсад нэг
  • Испанийн Хаант Улсад нэг
  • Бүгд Найрамдах Беларусь Улсад нэг
  • БНХАУ-ын Хонконгт хоёр
  • Япон улсад нэг
  • Швейцарын Холбооны Бүгд Найрамдах Улсад нэг
  • Шведийн Хаант Улсад нэг
  • Малайз улсад нэг
  • Бүгд Найрамдах Киргиз Улсад тус бүр нэг иргэн байна.

Дээрх 25 этгээдийн гадаад паспортын бүртгэлийг улсын бүртгэлийн мэдээллийн санд хүчингүй болгосон. Тэдгээрээс 12 этгээд гадаад улсад хэрэгт холбогдон шалгагдаж байгаа бөгөөд яаралтай шилжүүлэн авчирна. Харин хаяг нь тодорхой болсон үлдсэн 13 хүнийг "Эрх зүйн туслалцаа харилцан үзүүлэх гэрээ"-ний дагуу тухайн улсын хууль сахиулах байгууллагад албан бичиг хүргүүлж, хамтран ажиллаж байна.

Үүнд:

  1. Бүгд Найрамдах Киргиз Улсад хэрэгт холбогдон хоригдож байгаа нэг
  2. Бүгд Найрамдах Казахстан Улсад хэрэгт холбогдон шалгагдаж байгаа гурав
  3. Бүгд Найрамдах Солонгос Улсад зургаа
  4. Бүгд Найрамдах Хятад Ард Улсад шалгагдаж байгаа хоёр иргэн байна" хэмээн мэдээлэв.

Оршин суух хаяг нь тодорхойгүй байгаа 22 этгээдийг эрэн сурвалжлах ажлыг эрчимжүүлж байгаа аж. Гадаад улсад хэрэгт холбогдон шалгаж байгаа 12 этгээдийг авчрах бичиг баримтын бүрдэл хангагдсан бөгөөд онгоцны тасалбарыг захиалсан байна.

Мөн тэрбээр "Манай улсад Зорчигчийн мэдээллийн төвийг шинээр байгуулсан. НҮБ-ын Аюулгүйн зөвлөлөөс манай улсад үнэ төлбөргүй өгсөн gotravel гэдэг программ хангамж байгаа. Энэ нь гэмт хэрэг үйлдсэн хүмүүсийн авиа компаниудаар ниссэн хөдөлгөөнийг хайх зориулалттай. Түүнчлэн долоо хоног бүрийн Лхагва гарагт Засгийн газрын хуралдааны шийдвэр танилцуулсны дараа ХЗДЯ-наас хийж хэрэгжүүлж байгаа ажлынхаа талаар танилцуулдаг тогтсон цагтай болно" гэдгийг нэмж мэдээлэв.

Хөгжлийн бэрхшээлтэй иргэдийн хөдөлмөр эрхлэлтэд анхаарна
Хөгжлийн бэрхшээлтэй иргэдийн хөдөлмөр эрхлэлтэд анхаарна
 
Н.Учрал: Технологийн дэвшил ашиглан дуу хоолойгоо хүргэж байна
Н.Учрал: Технологийн дэвшил ашиглан дуу хоолойгоо хүргэж байна
Энэ мэдээ хуучирсан буюу 2023/06/07-нд нийтлэгдсэн мэдээ болно.