Ерөнхий сайд Л.Оюун-Эрдэнэ Хөгжлийн банк хэмээх хөрөнгөтнүүдийн тулаанаар улс төрийн шоу хийж, оноо цуглууллаа. Ямар ч хулгайчийг барьсангүй. Нүүрсний хулгайч хэмээх нутгаа зарагчдаар шоу хийлээ. Жинхэнэ нүүрсчид нь нүүрсээ хулгайлсаар байна. Авлига, албан тушаалын хэрэг хэмээх адгийн шааруудаар шоу хийлээ. Авлигачид нь албандаа хээл хахуулиа авсаар байна. Өөр хийсэн зүйл алга. Адаг сүүлд нь “Улаанбаатараас ярьж байна” хэмээх нэвтрүүлгээр өөрийгөө дөвийлгөж аваад бүрэн эрхийнхээ хугацааг дуусгавар болгож байгаа бололтой.

Тэгэхээр “Тунгалаг тамир” киноны Итгэлт баян “Хошууны булайг дэлгэнэ гэвэл далай, далай” гэдэг дээ. Түүн лугаа адил энэ төрийн 30 гаруй жилийн алдаа завхрлыг дурдана гэвэл ёстой л далай болох учраас сүүлийн найман жил олонхийн олонхиор засаглаж ирсэн МАН-ын эрх барьсан нөхцөл байдлыг аваад үзье. Бүр наашлуулж, Л.Оюун-Эрдэнийн засагласан гурван жилийг аваад үзэхэд л дэндүү гунигтай. Гэхдээ Монгол Улсыг уруудахад АН ч томоохон нөлөө үзүүлсэн гэдгийг заавал дурдах хэрэгтэй.

Шударга ёс тогтооно, МАНАН дэглэмийг устгана, авлига, хээл хахуулийг дарна хэмээн талбай дээр гарч ирсэн Л.Оюун-Эрдэнэ засгийн эрхийг авснаас хойшхи гурван жилд төрийн алба улам данхайж, төрлийн гэмээр алба бүрдэв. Монгол Улсын төсөв 10 гаруйхан их наядаар хэмжигдэж байсан бол Л.Оюун-Эрдэнийг засаглах гурван жилийн дотор 27 их наяд төгрөг болон өсөж, 2.5 хувиар тэлсэн ч айл өрхийн үүдээр орсонгүй.

Энэ их төсвийн хөрөнгө айл өрхийн үүдээр орохгүй, хаашаа алга болов гэхээр авлигын индексээр хамгийн их өссөн дэлхийн 10 орны нэгээр шалгарсан явдал нь өөрөө бататгаж өгнө. Нөгөө талаар дээрэм тонуул улам бүр гаарч байгааг харуулна. Мөн ардчиллын голомт нутагт эрдэм өвөрлөсөн “лут толгой” гэх Л.Оюун-Эрдэнэ Монгол Улсыг ардчиллын индексээр бүхэл бүтэн 20 байр ухараасан нь ямар хүн бэ гэдгийг давхар тодотгоно.

Өргөн хэрэглээний бараа бүтээгдэхүүний үнэ тэнгэрт гарч, иргэд олон нийт хоногийн хоолоо ч залгуулахад хүнд байна. Үүнийг “Махны үнэ өссөн, амьдрахад хүнд байна” гэж өөрийнх нь танхимын сайд Б.Дэлгэрсайхан хэлсэн. Монголын том хөрөнгөтөн “амьдрахад хүнд байна” гэж байгаа нь нийгмийн амьдрал ямар байгааг илтгэнэ. Гэтэл Статистикийн газраас захиалагт гэмээр мэдээлэл өгч, зүдэрсэн түмнээ доромжилно.

Саяхан даа, 2016 онд МАН-ыг засаг авч байхад ам.долларын ханш 1800 төгрөг байсан бол өнөөдөр 3500 төгрөгт хүрсэн. Л.Оюун-Эрдэнийг засаг авснаас хойш гэхэд л 600 гаруй төгрөгөөр өссөн нь бүхий л бараа бүтээгдэхүүнд нөлөөлж байна.

Урьд өмнө төрийн зарим албаны хариуцлагагүйгээс иргэд амь насаа алдахад худлаа ч гэсэн уйлж байгаад уучлалт гуйдаг байсан. Харин наяад оны “харвард” тэргүүтэй бүлэглэл огтхон ч үгүй. Өнгөрөгч гурван жилийн хугацаанд үер ус, дэлбэрэлт, тог цахилгаанаас үүдэлтэй хэчнээн ч хүний амь эрсдэв. Хэн ч уучлал гуйсангүй. Л.Оюун-Эрдэнэ 2021 онд МАН-ын дарга болохдоо “Шинэ сэргэлтийн бодлого” хэмээх томоохон хөтөлбөр танилцуулснаас нэгээхэн ч зүйл хэрэгжсэнгүй. Л.Оюун-Эрдэнийн засагласан гурван жил бол дэндүү гунигтай, дэндүү харамсалтай өнгөрлөө.

Tumen.mn