Английн “Манчестер Сити” дараа зун багийнхаа ахлах дасгалжуулагч Пеп Гвардиолаг гэрээгээ сунгалгүйгээр явж таарна хэмээн тооцож, зам салахад бэлдэж эхэлсэн бололтой. Каталан гаралтай дасгалжуулагч 2016 онд “Манчестер Сити”-гийн төсөлд нэгдсэнээс хойш 15 цом өргүүлж, ховорхон дасгалжуулагч гэдгээ батлан харуулсаар байгаа. Үүнд, түүхэндээ анх удаа Аваргуудын лигт түрүүлсэн мөн Премьер лигийн түүхэнд дөрвөн жил дараалан түрүүлсэн анхны баг болсон гэх мэт том амжилтуудыг баталгаа болгон дурдаж болох юм. Гэвч аливаа зүйл мөнхийн биш. Гвардиолагийн хувьд 2024/25 оны улиралд багаа удирдаад, бууриа сэлгэх магадлал өндөр. Тиймээс түүнгүйгээр хэрхэн цааш ажиллах төлөвлөгөөгөө бэлдэж эхэлжээ. Гвардиолаг орлож болох дасгалжуулагчдаар “Жирона”-гийн Мичел, “Байер Леверкузен”-ий Хаби Алонсо, Германы шигшээ багийн дасгалжуулагч Юлиан Нагельсманн, мөн саяхан “Брайтон”-той гэрээгээ цуцалсан Роберто Де Зерби нар нэрлэгдэж байгаа гэнэ. Үүний зэрэгцээ ирэх намар “Манчестер Сити”-гийн санхүүгийн 115 зөрчлийн эцсийн шийдвэрийг Хараат бус хороо гаргах ёстой. Хэрвээ буруутай гэж үзвэл Европын цомын тэмцээнд оролцох эрхийг нэгээс дээш жилээр ч хасч мэдэх юм. Өөрөөр хэлбэл, мандаж буй “Манчестер Сити”-гийн хувьд ойрын жилүүдэд хүндрэл бэрхшээлтэй тулгарах магадлал нэмэгдсээр байна.

Tumen.mn