Авлигатай хийх тэмцлийг улам эрчимжүүлж, авлигачидтай нэгбүрчлэн хариуцлага тооцно гэх байр суурийг МАН-ын томчууд болох Л.Оюун-Эрдэнэ, Д.Амарбаясгалан нар илэрхийлснээс хойш гурван жил гаруйн хугацаа өнгөрчээ. Тодруулбал, Л.Оюун-Эрдэнэ Ерөнхий сайд болоод МАН-ын даргын хувиар 2021 онд Их хурлынхаа индэр дээрээс хэлэхдээ, "Авилгатай хийх тэмцлийг улам эрчимжүүлнэ. Монгол Улс авлигын индексээр дэлхийд 111-т эрэмбэлэгдэж байгаа нь туйлын хангалтгүй үзүүлэлт юм. Авлига, албан тушаалын хэргийн ялын бодлогыг чангатгана. Төрийн албан хаагчдын орлогоосоо давсан тансаг хэрэглээнд хяналт тавина.
Хөрөнгө орлогын мэдүүлгийг татвар төлөлттэй уялдуулна. Монгол Ардын Нам шинэ зуунд улс төрийн манлайлагч байр сууриа хадгалахын тулд авлигатай хийх тэмцлийг улам бүр эрчимжүүлэх ёстой. Энэхүү тэмцэл нь намын гишүүн нэг бүрийн эрхэм зорилго, журамт үүрэг байх учиртай... Төр хөгжлийг гацаагч, удаашруулагч биш, харин дэмжигч, хурдасгагч, иргэддээ ҮЙЛЧЛЭГЧ байх ёстой” гэж байв. Харин өдгөө УИХ-ын дарга болсон Д.Амарбаясгалан тухайн үед МАН-ын генсекийн хувиар хэлэхдээ “МАН цаашид авлига, хүнд сурталтай тэмцэх болно. Тухайлбал, авлигын гэмт хэрэгт холбогдож шүүхээр шийдэгдсэн болон ёс зүйн зөрчил гаргасан хүнд хариуцлага тооцох заалтыг намын дүрэмд тусгаж хэрэгжүүлнэ. Авлига, хүнд сурталтай тэмцэх дунд болон урт хугацааны хөтөлбөрөө боловсруулна" хэмээж байв. Тэгвэл өнөөдөр өрнөж буй үйл явцыг харахад, Л.Оюун-Эрдэнэ, Д.Амарбаясгалан нарын хэлж ярьж байснаас тэс өөр зүйлс өрнөж байна. Асуудалд холбогдсон улс төрийн нөлөө бүхий албан тушаалтнууд ажил албаа зоргоороо хашсаар байна. Тэдний нэг бол Үндэсний статистикийн хорооны дарга Б.Батдаваа юм. 44 их наядын гэх тодотголтой алдарт нүүрсний хэрэгт нэр холбогдсон Б.Батдаваа өөрийгөө ямар ч гэм зэмгүй гэх байр суурийг илэрхийлдэг. Гэвч Нүүрсний хулгайн асуудлаарх Хянан шалгах түр хорооны нээлттэй сонсгол дээр яригдсан зүйлсийг авч үзэхэд, Б.Батдаваа нь төр засгийн хариуцлагатай алба хашиж суух бус хуулийнханд сайтар шалгуулж байх ёстой. Гэтэл Б.Батдаваа эрх мэдээ өсгөж Монголбанкны ерөнхийлөгчийн суудалд санаархаж байгаа талаар яригдаж эхэллээ. Бүр болохгүй бол Тэргүүн дэд ерөнхийлөгчийн суудалд очих талаар ч санаархаж буй талаар нь эх сурвалжууд хэлж ярьж байна. Тодотгоход, Монголбанк нь УИХ-ын даргын эрхлэх асуудлын хүрээнд багтдаг. УИХ-аас Монголбанкны ерөнхийлөгчийг томилдог. Тэгэхээр Төв банкийг удирдахаар далдуур улайрч буй Б.Батдаваагийн санаархлыг спикер Д.Амарбаясгалан дэмжиж өөгшүүлбэл өнөөх хэдэн жилийн өмнө хэлж ярьснаасаа дэндүү хол ухарсан явдал болох юм. Нүүрсний хулгайтай тэмцэхээ илэрхийлж байсан Д.Амарбаясгалан даргын хамар дор нүүрсний хэрэгт холбогдсон Б.Батдаваа гэж хүн ажлаа хийсээр л байна. Бүр болоогүй Монголбанкны ерөнхийлөгч болох гээд санаархаж буйг эрхэм спикер анхааралдаа авах шаардлагатай байна. Б.Батдаваагийн нэр холбогдсон нүүрсний хэргийн талаар сануулахад, түүний гэр бүлийн хамаарал бүхий хүмүүсийн нэр дээрх найман компаниар дамжуулан 1.1 сая тонн нүүрсийг гаалийн бүрдүүлэлтгүйгээр хил нэвтрүүлсэн гэх асуудал яригдсан. Нүүрсний сонсголын үеэр нийт 5,2 сая тонн нүүрс гаалийн бүрдүүлэлтгүй буюу хулгайгаар гарсан нь шинжээчийн дүгнэлтээр тогтоогдсон байдаг. Гаалийн бүрдүүлэлтгүй гарсан 5,2 сая тонн нүүрсний 25 хувь буюу 1,1 сая тонныг Б.Батдаваа болон түүний эхнэрийн хамаарал бүхий компаниуд хууль бусаар гаргасан гэж шинжээч дүгнэсэн талаар яригдсан. Б.Батдаваагийн эхнэр Ц.Амгалангийн нэр дээр бүртгэлтэй нүүрс тээврийн 8 компани байгаа бөгөөд дээрх компаниудаараа 4000 гаруй удаа гаалийн бүрдүүлэлтгүйгээр нүүрс тээвэрлэсэн гэх шинжээчийн дүгнэлт гарсан гэх мэдээлэл дэлгэгдсэн. Б.Батдаваагийн эхнэр Ц.Амгалан нь УИХ-ын гишүүн Сү.Батболдын үеэлийн охин юм. Ер нь бол Б.Батдаваагийн төдийгөөс өдийг хүртэлх замналд улс төрийн нөмөр нөөлөг бишгүй бийг эх сурвалжууд хэлдэг. Хэдий тийм ч бүхэл бүтэн нүүрсний хэрэгт холбоотой түүнийг улам дээшээ крандаад байх нь зохимжгүй юм.
