“Улаанбаатар” олон улсын кино наадам 10-р сарын 16-ны өдөр эхэллээ. Тус наадам энэ сарын 22 хүртэл үргэлжлэх бөгөөд өчигдөр “Монгол кино ” төрөлд шилдгүүдээ шалгаруулсан юм.

Өдгөө 16 дахь удаагаа зохиогдож буй энэхүү наадмаас Монголын “Hulegu pictures”, “Tulgatan pictures”, БНСУ-ын “KortOp media”-ийн хамтын бүтээл “Өмнөдийг зорих замд” уран сайхны кино дөрвөн төрөлд “Хангарди” шагналыг хүртсэн байна.

Тодруулбал, шилдэг найруулагчаар МУСТА С.Баттулга, шилдэг хөгжмийн найруулгаар хөгжмийн найруулагч И Ги Жүн, шилдэг эрэгтэй туслах дүрээр БНСУ-ын жүжигчин Жон Жунг Ү нар шалгарч “Шилдэг кино” шагналыг хүртлээ.

“Өмнөдийг зорих замд” киноны зураг авалт Өмнөговь аймгийн Ноён, Сэврэй сумын байгалийн өвөрмөц тогтоц бүхий газруудад хийгдсэн бөгөөд Монгол Улсын хилчид, Өмнөд, Умард Солонгос Улсын түүх, монголын говийн үзэсгэлэнт байгаль, монгол хүний нинжин сэтгэлийн тухай өгүүлсэн нь үзэгчдийн анхаарлыг татаж буй.

Тус кино Улаанбаатар хотын бүх кино театрт өдөр бүр гарч байгаа бол Хэнтий, Дорнод, Сүхбаатар, Өмнөговь, Дундговь, Говьсүмбэр, Дорноговь болон Өвөрхангай, Баянхонгор, Говь-Алтай, Ховд, Увс, Завхан аймгийн үзэгчдэд мөн хүрч эхэлсэн байна.