Ерөнхий сайдын дэргэдэх Эдийн засгийн хөгжлийн зөвлөлийн 5 дугаар хуралдаан өчигдөр /2025.05.05/ болж, Худалдан авах ажиллагааны тухай хуулийн төслийг хэлэлцсэн байна.

Энэ үеэр ЗГХЭГ-ын дарга Н.Учрал хуулийн төсөлд тусгасан:

• Байгаль орчин, нийгэмд үзүүлэх нөлөөллийн шалгуурыг тендерийн үнэлгээнд харгалздаг болох,
• Төр өөрт байгаа мэдээллийг нэхэхгүй, худалдан авах ажиллагааг AI ашиглаж, цахимаар явуулна,
• Шүүхийн маргааныг олон улсын жишгийн дагуу хараат бус, дагнан байгуулсан зөвлөл олонхын зарчмаар шийддэг болгох,
• 10 тэрбум төгрөг хүртэлх төсөвт өртөгтэй тендер шалгаруулалтад оролцоход баталгаа шаардахгүй зэрэг шинэчилсэн заалтыг танилцуулжээ.

Төсөл батлагдвал тендер шалгаруулалтын 99 хувьд баталгаа гаргалгүй оролцох боломжтой болох юм байна.

Уг нь тендерийн баталгаа гэдэг тендерт оролцогч байгууллага тухайн тендерийн нөхцөл, шаардлагыг үнэн зөв, шударгаар биелүүлнэ гэдгээ баталж өгдөг цор ганц барьцаа буюу санхүүгийн баталгаа байдаг.

Одоо хүчин төгөлдөр хэрэгжиж буй хуулиар тендерийн баталгааг 100 сая төгрөгөөс дээш төсөвт өртөгтэй багц тус бүрд гаргуулна гэж заасан. Өөрөөр хэлбэл 100 сая төгрөгийн тендерт оролцож байгаа бол захиалагч нь баталгаа болгож 2 хувь буюу 2 сая төгрөгийн баталгаа шаардана.

Энэ нь тендерт оролцогч санал болгосон нөхцөлөө цуцлахгүй байх, гэрээ байгуулахаас татгалзахгүй байх зорилготой барьцаа.

Харин 10 тэрбум хүртэлх тендерт уг баталгааг шаарддаггүй болсноор нийт тендерийн 99 хувь нь хяналтгүй болж, тендерт оролцогч нөхцөлөөсөө буцах, гэрээгээ байгуулахгүй байх боломжтой болох юм.