МАН-ын Бага хурлын өмнө телевизийн ярилцлагаар намдөаа бөмбөг тэсэлсэн хүн бол Б.Энхбаяр. Тэр намынхаа дотоод асуудлыг, идээ бээрийг шахалцах эхлэлийг тавьсан. Түүний дараа санаатай болон санамсаргүй үйл явдлууд өрнөж, асуудал улам хурцадсан билээ.

Үүний үр дүнд Б.Энхбаяр намынхнаасаа багагүй зэмлэл хүртжээ. Түүнийг намаас хөөж, хариуцлага тооцохыг Бага хурлын үеэр гишүүд нь шаардсан байна. Тухайлбал, ХЗДХ-ийн сайд асан Ц.Нямдорж, "Хууль зүй, дотоод хэргийн сайд байсан хүн ингэж болохгүй. Намынхнаа байнга шантаажилдаг" гэсэн байр суурийг илэрхийлсэн гэдэг мэдээлэл бий.

Тэгвэл өнөөдөр /2025.09.29/ УИХ-ын гишүүн Б.Баярбаатар Б.Энхбаярыг намаас хөөх гарын үсэг цуглуулж эхэлсэн талаарх мэдээллийг задаллаа. Тэрбээр, “УИХ-ын гишүүн Б.Энхбаярыг намаас хөөх асуудал Бага хурал дээр яригдсан. Б.Энхбаяр гишүүн намаас хөөгдөх шаардлагаа хангах нь битгий хэл хэтрүүлсэн. Өнөөдөр Бага хурлын 100 гаруй гишүүдээс түүнийг хөөх гарын үсэг цуглуулж өгнө гэх мэдээлэл бий. Гэхдээ надад хараахан ирээгүй байна" хэмээн ярилаа.

Б.Энхбаярыг Бага хуралдаа огт оролцоогүй гэдэг мэдээлэл ч түгээд буй. Тэрбээр, эхний санал хураалтад оролцоод хуралдааныг орхин гарсан байна. Гэхдээ тухайн өдрийн оройн 18.00 цагийн үед сэтгүүлчдэд байр суурь илэрхийлээд явсан.