Өнөөдөр /2025.09.30/ 15:00 цагаас Монгол Улсын Ерөнхий сайд Г.Занданшатар ард түмэндээ хандаж цаг үеийн асуудлаар мэдэгдэл хийлээ. Энэ үеэрээ УИХ-ын гишүүн Б.Энхбаярыг Хууль зүй, дотоод хэргийн сайдаар томилж буйгаа албан ёсоор мэдэгдэв.

Тэрбээр, "Өнөөдөр бид долдугаар сарын 9-ний өдөр "Эрдэнэс Тавантойлгой" ХХК-д онцгой дэглэм тогтоож, хяналт шалгалтын ажлыг эхлүүлж, нүүрсний хулгайтай тэмцсэн ажлын үр дүнг танилцуулж байна. Эдийн засгаа сэргээхийн тулд нүүрсний хулгайтай тэмцэхээр ажлаа эхлүүлсэн. Намайг Ерөнхий сайдаар томилогдох үед төсөв 3.3 их наяд төгрөгөөр тасрах эрсдэл үүссэн, эдийн засгийн хөгжил 2.4 хувь болж унасан байсан. Энэ нь нүүрсний үнэ буурснаас буюу нүүрснээс шалтгаалсан. Ингээд ажлаа аваад түүхэндээ анх удаа 2.2 их наядаар хэмнэсэн төсвийн тодотголыг хийсэн. Есдүгээр сарын байдлаар эдийн засаг сэргэж 5.7 хувьд хүрсэн. "Эрдэнэс тавантолгой"-д онцгой дэглэм тогтоосны үр дүнд наймдугаар сарын байдлаар борлуулалтын орлого 1.6 дахин, биржийн тээвэр 1.5 дахин, экспорт 1.2 дахин, үр ашиг нь 3 дахин, орлого 1.3 дахин, олборлолт 1.1 дахин өссөн. Энэ бүхэн нь тэнд бугшсан хулгайтай тэмцсэний үр дүн. Тэнд явагдсан хяналт шалгалтын үр дүнд нүүрсний хулгайн маш олон арга хэлбэрүүд ил тод болсон. Бүгдийг нотолгоотой, баримттайгаар АТГ-т шилжүүлсэн байгаа. 1 их наяд төгрөгөөр барьж байгуулсан нүүрс баяжуулах үйлдвэрийг 18 км-ийн цаана яагаад байгуулсан бэ. Энэ хооронд 1.5 сая төгрөгөөр тээвэр хийдэг байсан. Онцгой дэглэм тогтоосноор 400 мянга болж буурсан. Долдугаар сарын 19-ны өдөр "Тавантолгой" компани дээр очиж ажиллахад олон арван хулгайн тухай яригдаж байсан. Бүгдийг нь таслан зогсоож АТГ-т шилжүүлсэн. Нүүрс баяжуулах үйлдвэрийг ийм хол зайд “Бортээг” гэдэг уурхайн аман дээр барьчихсан. Тэр нь ашиглалтгүй. Ийм учраас бидний зүгээс нүүрсний хулгайг бүр мөсөн таслан зогсоож, эдийн засгийн үр ашгийг сэргээхийн тулд тэнд байгаа орд газруудын үр ашгийг сайжруулах шаардлага гарсан. Иймд Монгол Улсын төсөвтэй хамт эдийн засгийн эргэлтэд ороогүй байгаа цорын ганц газар болох Бортээгийн ордыг эдийн засгийн эргэлтэд оруулах тухай УИХ-ын тогтоолын төслийг УИХ-ын төсөвтэй хамт УИХ-д өргөн барьсан. Бортээгийн ордыг ашиглах тогтоолыг өргөн баримагц, гурван сарын өмнө нэр дэвшихгүй гэж байсан УИХ-ын дарга маань яаран сандарч намын даргад нэр дэвших мэдэгдэл хийж эхэлсэн. Залуучууд гудамжинд жагсаж нүрсний хулгайтай тэмцэхийг шаардаж байсан. УИХ, Засгийн газар тухайн үед нээлттэй сонсголыг тухайн үеийн ХЗДХ-ийн сайд Б.Энхбаяр зохион байгуулж байсан. УИХ-ын даргыг нүүрсний хулгайн тэмцэлд хамтран ажиллана гэж итгэж, нүүрсний хулгайд холбогдсон гэдэгт итгэхийг хүсээгүй. Харамсалтай нь их хурлын дарга энэ асуудлуудад нэр холбогдсон байсан. Өнөөдөр эвлэлдэн нэгдэх тухай ярьж байна. Эв нэгдэл шударга ёсон дээр тулгуурлах ёстой. Тийм учраас Монгол Улсын Ерөнхий сайд би Монгол Улсын Үндсэн хуульд заасан онцгой бүрэн эрхийнхээ хүрээнд УИХ-ын гишүүн Б.Энхбаярыг хууль зүй, дотоод хэргийн сайдаар томилж буйгаа ард түмэндээ хандан мэдэгдэж байна. Нүүрсний хулгайтай хийх энэ тэмцлээ илүү эрч хүчтэй, шийдэмгий үргэлжлүүлэхийн тулд Б.Энхбаярыг хууль зүй, дотоод хэргйин сайдаар томиллоо" гэв.