Бүгд Найрамдах Киргиз Улсын Парламент /Жогорку Кенеш/-ын урьдчилсан сонгууль 2025 оны 11 дүгээр сарын 30-ны өдөр болсон.

Энэ удаагийн сонгуулийг шинэ системээр явуулсан бөгөөд сонгогчдод саналаа өгөх таатай нөхцөлийг бүрдүүлэх, ирцийг нэмэгдүүлэх зорилгоор зайнаас санал авах механизмыг анх удаа хэрэглэснээрээ онцлог байв. Сонгуулийн ерөнхий хорооны Мэдээллийн технологийн төвийн Программ хангамжийн хэлтсийн ахлах мэргэжилтэн Б.Догсом, гадаад харилцаа, хамтын ажиллагааны асуудал хариуцсан ажилтан Ч.Баттөмөр уг сонгуулийг ажиглаж, зайнаас санал авах туршлага судаллаа.

Сонгогч саналаа өгөхөөр санал авах байранд очихдоо гадаад паспорт, иргэний үнэмлэх, болон Тундук (Киргиз улсын иргэнд зориулсан цахим үйлчилгээний систем)-ийг ашиглан саналаа өгч байв. Сонгогчийн бүртгэлийн төхөөрөмж нь сонгогчийн гадаад паспорт, иргэний үнэмлэх, тундукийг уншихаас гадна сонгогчийн царайг таних, хурууны хээ уншиж баталгаажсаны дараа саналын хуудсыг хэвлэж чаддаг бүртгэлийн цогц төхөөрөмж аж.

Харин сонгогч нь зайнаас санал өгөхөөр бол тундук дээрээ хүсэлтээ өгнө. Хүсэлтээ өгсөн сонгогч нь аль ч санал авах байранд саналаа өгөх боломжтой. Сонгогч олноор цуглардаг их дэлгүүр, худалдааны төв, онгоцны буудал зэрэг 27 газар зайнаас санал авах байрыг байрлуулжээ. Зайнаас санал өгөх сонгогчид тэдгээр байранд олноороо санал өгч байв.

Сонгогчийн нэрийн жагсаалтад 4.3 сая иргэн бүртгэгдсэнээс 36.9 хувь нь саналаа өгчээ. Уг сонгуулиар парламентын 3 мандаттай 30 тойрогт 90 гишүүний суудалд 460 нэр дэвшигч өрсөлдсөн юм.

Энэ удаагийн сонгууль ажигласан гадаадын төлөөлөөгчдийг Бүгд Найрамдах Киргиз Улсын Ерөнхийлөгч Садыр Н.Жапаров хүлээн авч, дурсгалын зураг татууллаа.