“Төв цэнгэлдэх хүрээлэн” нийслэлийн өмчит аж ахуйн тооцоот газрын захирлаар ажиллаж байсан Ж.Энхжаргалан албаа хүлээлгэн өгсөн даруй Багануур дүүргийн МАН-ын хорооны ажилтан Д.Лхагвадулам гэх эмэгтэй тус газрын захирлаар томилогджээ. Энэ цагаас хойш “Төв цэнгэлдэх хүрээлэн”-гийн алба хаагчдыг багануурчуудаар дүүргэж, талбайн үйлчилэгчдээс бусад оффис ажилтнуудыг халж сэлгэн, Төв цэнгэлдэх хүрээлэнгийн үйл ажиллагааг ойлгож мэддэггүй туршлагагүй ойр тойрны хамсаатан, тодруулбал багануурт голцуу ажиллаж амьдарч байсан хамаарал бүхий хүмүүсээр гол төлөв Цэнгэлдэхийн алба хаагчдыг бүрдүүлээд зогсохгүй арван жилийн ангийн нөхдүүдээ ч цэнгэлдэхэд ажилд авсан гэнэ. Гол асуудал нь төрд алба залгуулж байгаагүй Д.Лхагвадулам гэгч нь ямар ч сонгон шалгаруулалтгүй крандуулж ирчихээд “Төв цэнгэлдэх хүрээлэн”-гийн ажлыг унагааж байгааг НИТХ-ын төлөөлөгчид шивнэлдэх болжээ.

Чухам ямар зам мөрөөр “Төв цэнгэлдэх хүрээлэн”-гийн захирлаар томилогдов гэхээр Д.Лхагвадулам нь УИХ-ын гишүүн Ц.Сандаг-Очирын хамаатан аж. Тиймээс Хотын даргаар дамжуулан, захирлаар томилогджээ. Улс төрийн эгзэгтэй үед Хотын даргад Багануур дүүргийн МАН-ын хорооны дэмжлэг үзүүлнэ гэсэн тохиролцоотой ирсэн гэж л харахаас өөр аргагүй. Өнгөрөгч зургаадугаар сард Төв цэнгэлдэхийн захирлаар томилогдсон Д.Лхагвадулам ямар арга замаар сонгон шалгаруулалтгүй гүйцэтгэх захирлын албанд томилогдсон гэдгээ, шоу тоглолт арга хэмжээ хийх өдрийг хэнд ямар замаар өгч байна гэдгээ ч тайлбарлах учиртай болоод байна.

Угтаа бол нийслэлийн өмчит үйлдвэрийн газрын захирлыг ил тод сонгон шалгаруулалт зарлаж, нээлттэй шалгаруулан томилох ёстой. Гэтэл Д.Лхагвадулам танил талаа ашиглаж, сонгон шалгаруулалтгүй томилогдсон учраас ашиг сонирхлын зөрчил, авлигын эсрэг болон Төрийн өмчийн тухай хууль зөрчсөн гэж үзэхээс өөр аргагүй.

Тэрбээр Багануурын МАН-д ажиллахын зэрэгцээ 2019 онд үслэг арьсан эдлэл үйлдвэрлэл худалдаа, барилгын дуусгах шатны үйл ажиллагаа, арьс шир, үслэг эд боловсруулах, төлбөр эсвэл гэрээний үндсэн дээр хийгдэх бөөний худалдаа гэх дөрвөн үндсэн чиглэлээр “Арван марал гялбаа” ХХК үүсгэн байгуулжээ.

Өдгөө Гүйцэтгэх захирлаар нь Батжаргалын Энхбат ажилладаг байна. Үүгээрээ дамжуулан, “Багануур нэхий бренд”-ийг үүсгэж, үүгээрээ оны шилдэг бүтээгдэхүүн үйлдвэрлэсэн эзнээр ч шалгарч байжээ. Тэгэхээр Д.Лхагвадулам Төрийн албанд гүйцэтгэх албан тушаалд томилогдох нь ашиг сонирхлын зөрчилтэй гэж үзнэ. Өөрөөр хэлбэл хууль зөрчин ажиллаж байна гэсэн үг.

Тэгээд ч үндэсний баяр наадам болон бусад арга хэмжээг өндөр хэмжээнд зохион байгуулах учиртай “Төв цэнгэлдэх хүрээлэн”-гийн захирлаар ашиг сонирхлын зөрчилтэй бөгөөд ажлаа мэдэхгүй хүнийг гаднаас томилох нь буруу гэдгийг өдгөөгийн захирлын үйл ажиллагаанаас харж болно. Гагцхүү захирал, даргыг нь солихдоо хүрвэл хамт олон дундаас нь ажлаа мэдэх, хамт олноо мэдэх хүнийг томилж баймаар. Тиймээс Хотын удирдлагууд “Төв цэнгэлдэх хүрээлэн”-гийн захирлын томилгоог эргэж харахгүй бол айсуй баяр наадмаар “Зуун задгай жаран хагархай” сууж байхыг үгүйсгэхгүй. Ёстой л “Охин тосгоноос явсан ч тосгон охиноос явсангүй” гэгчээр “Д.Лхагвадулам Багануураас явсан ч Багануур түүнээс яваагүй” бололтой.