Парламентын гишүүдийн тоог 76-аас 126 болгосон нь хууль, эрх зүйн орчныг илүү өргөн хүрээнд харж, иргэдийн төлөөллийг нэмэгдүүлнэ гэж тайлбарлаж байв. Гэвч бодит байдал дээр энэ өөрчлөлт чанарыг биш, тоог л нэмсэн үү гэдэг асуулт өнөөдөр урган гарч байна.

Учир нь, өнөөгийн 126 гишүүн олон нийтийн хүлээлтэд хүрсэнгүй, хариуцлагаас зугтсан хэвээр, бүрэн эрхээрээ “хуягласан”, иргэдийн төлөөлөл биш, дээр нь заларсан давхарга мэт харагдаж эхэлсэн. Уг нь тэд ард түмнийг төлөөлөх ёстой хүмүүс. Гэвч бодит байдал дээр ард түмнээсээ тасарсан “хаан” маягийн тогтолцоо руу гулсаж байна.

Өнөөдөр Монголд УИХ-ын гишүүнийг бодитоор эгүүлэн татах механизм бараг байхгүй. Үүний тод жишээ нь М.Нарантуяа-Нара-тай холбоотой иргэдийн гомдлыг хэлэлцэх ёстой байсан Ёс зүйн дэд хороо ирц хүрээгүй гэх шалтгаанаар хуралдаж чадаагүй. Хуралдсан ч эгүүлэн татах боломж байхгүй. Харин Ерөнхийлөгчөөс өргөн мэдүүлсэн УИХ-ын гишүүнийг эгүүлэх татах тухай хуульд ёс зүйн зөрчил гаргасан, өргөсөн тангаргаасаа няцаж ноцтой зөрчил гаргасан, гэмт хэрэг үйлдсэн болох нь шүүхийн эцсийн шийдвэрээр тогтоогдсон, жагсаалтаар нэр дэвшиж сонгогдсон гишүүн ёс зүйн ноцтой зөрчил гаргасан тохиолдолд эгүүлэн татна гэхчлэн тун тодорхой заасан.

Мөн энэ хууль батлагдвал “кноп”-ны гишүүд, компани, бүлэглэлийн эрх ашгийг хамгаалагчид, ёс зүйн доголдолтой улстөрчид шууд хариуцлага хүлээх механизм бий болно. Тиймээс л зарим гишүүн үүнийг “парламентын ардчилалд халдсан” гэх зэргээр гуйвуулж эхэлсэн.

Үнэндээ энэ бол ардчиллыг хамгаалах оролдлого. Хамгийн хоржоонтой нь эгүүлэн татагдах магадлалтай хүмүүс өөрсдөө энэ хуулийг хэлэлцэх эсэхийг шийднэ. Тэгэхээр парламент өөрийгөө цэвэрлэх үү эсвэл өөрийгөө хамгаалах уу гэдэг асуулт гарч ирнэ. Хэрэв энэ хуулийн төсөл унавал 126 гишүүнтэй парламент гэдэг нь иргэдийн төлөөлөл биш, хариуцлагагүй эрх мэдлийн клуб болж үлдэнэ. Харин батлагдвал Монголын улстөрд анх удаа “сонгогдсон ч хариуцлага хүлээдэг” жишиг тогтоно.

Эх сурвалж: Erennews.mn