Оюуны өмчийн газраас “Эрдэнэс алт ресурс” ХХК-ийн лого тэмдэгт оюуны өмчийн гэрчилгээ олгож, хууль ёсоор баталгаажууллаа. Ийнхүү тус компанийн лого сүлд оюуны өмчийн хуулийн дагуу хамгаалагдах боллоо.

”Эрдэнэс алт ресурс” ХХК-ийн логоны бэлгэдэл нь компанийн нэрийн эхний үсгийн нийлбэр бөгөөд уул байгаль, байгалийн баялгийг мөн дүрсэлсэн байдаг. Эдгээрийг холбосон шулуун дүрс нь байгаль дэлхий болоод түүний эрдэнэс баялаг нь бүх цаг үед холбоо хамааралтай гэдгийг илтгэж буй юм. Харин алтан шар өнгө нь алт буюу байгалийн баялаг, номин ногоон өнгө нь байгаль дэлхий хийгээд эрдэнэсийг бэлгэдэн илэрхийлж байгаа юм.

”Эрдэнэс алт ресурс” ХХК нь уул уурхайн чиглэлээр зөвлөгөө өгөх, ашигт малтмал эрэх, хайх, ашигт малтмал олборлох, ашиглах, гэрээгээр өрөмдлөг хийх зэрэг чиг үүргийг хэрэгжүүлэн ажиллаж буй төрийн өмчит компани юм. Түүнчлэн байгаль орчинд ээлтэй уул уурхайг хөгжүүлэн эцсийн бүтээгдэхүүнийг эдийн засгийн эргэлтэд оруулж, тогтвортой, хариуцлагатай үйлдвэрлэлийг эрхэмлэн, олон улсын стандартад нийцсэн эрэл хайгуулыг хийж, эх орныхоо баялгийг нийтэд жигд хүртээх алсын хараа, эрхэм зорилготойгоор үйл ажиллагаа явуулж байна.