Тэрээр "ҮБХ-гоор намынхаа зохион байгуулалтыг хэлэлцэж дууслаа. Таван дэд даргаа сонголоо. Ерөнхий нарийн бичгийн даргаа жинхэлж тогтоолыг нь баталлаа. ҮБХ-ныхоо гишүүдийн дийлэнх олонхийн саналыг авч сонгогдлоо. Энэ нь манай намынхан маш их итгэл, найдвар хүлээлгэж байгаагийн илэрхийлэл боллоо гэж бодож байна.

Би ҮБХ-ныхоо гишүүдэд хандаж үг хэлсэн. Тэр үгэндээ намынхаа эв нэгдлийг хангахад анхаарал хандуулна гэдгээ хэлсэн. Фракцуудынхаа төлөөлөлтэй богино хугацаанд уулзаж саналыг нь сонсож нэг зүгт чиглүүлэх ажлыг хамгийн түрүүнд хийнэ.

АН-ын ерөнхий нарийн бичгийн дарга нь намынхаа гүйцэтгэх байгуулага буюу Улс төрийн зөвлөлөө тэргүүлж, Хэрэг эрхлэх газраа удирдаж ажиллдаг. Тиймээс 1980, 1990, 2000 оны төлөөлөл болсон залуучуудыг намынхаа удирдах албанд түлхүү авч ажиллуулна.

2027, 2028 оны сонгуульд ялах нь миний хүсэл биш, монголчуудын захиалга, АН-ын заавал хийх ёстой ажил. Бид маш цомхон төртэй, цомхон Засгийн газрыг санал болгоно. Төрийн зардлыг бууруулна. Хувийн хэвшлээ маш сайн дэмжинэ. Дэлхийд өрсөлдөх чадвартай хувийн хэвшилтэй улс орон л хөгждөг. Үүнийг бид үйл ажиллагаагаараа харуулна.

АН-ын даргын баруун, зүүн гар нь ерөнхий нарийн бичгийн дарга УИХ дахь намын бүлгийн дарга хоёр байх ёстой. Удахгүй бүлгийн даргын асуудал шийдэгдэнэ.

ҮБХ одоо Ерөнхийлөгчийн сонгуульд нэр дэвшигчийг тодруулах журмыг хэлэлцэж байна. Залгуулаад 2028 оны УИХ-ын сонгуульд нэр дэвшигчдийг тодруулах журмыг хэлэлцэнэ. Шалгуур тодорхой болсны дараа Ерөнхийлөгчийн сонгуульд нэр дэвших хүсэлтэй гишүүдийнхээ саналыг авна. Одоогийн байдлаар УИХ-ын хоёр гишүүн Ерөнхийлөгчийн сонгуульд нэр дэвших хүсэлтээ албан ёсоор илэрхийлсэн. Миний хувьд одоогоор нэр дэвших тухай бодсон зүйл алга.

Мөн 24 сарын өмнө УИХ-ын сонгуульд нэр дэвших хүсэлтэй хүмүүсийнхээ саналыг цуглуулж үе шаттайгаар шалгаруулалт явуулж богино жагсаалт гаргана. Манай намаас хэн ч нэр дэвшсэн ялах үйл ажиллагаа явуулж чадах багийг цуглуулж, санхүүгийн боломжийг бүрдүүлж, нийт гишүүдийнхээ урам зоригийг бадраана гэдэгтээ итгэлтэй байгаа" гэв.