Нийслэлийн ИТХ-ын Ээлжит бус XIII хуралдаанаар нийслэлийн 2026 оны төсөвт нэмэлт, өөрчлөлт оруулах тухай асуудлыг хэлэлцэх үеэр Нийслэлийн ИТХ дахь МАН-ын бүлгийн дарга Ж.Сандагсүрэн УИХ-ын сонсголын үеэр яригдсан асуудлаар Нийслэлийн ИТХ-ын дарга Д.Ихбаяр, Засаг дарга Б.Пүрэвдагва нарын байр суурийг тодруулав.

Тухайлбал, Нийслэлийн ИТХ-ын төлөөлөгчид нийслэлийн өмчит компаниудын гүйцэтгэх удирдлага болон ТУЗ-д ажилладаг асуудлаар нийгэмд буруу, зөрүү мэдээлэл гарч байгааг дурдаад “Нийслэлийн ИТХ-ын төлөөлөгчид гүйцэтгэх засаглалд орж ажиллах уу, үгүй юу гэдэгт цэг тавимаар байна. Нийслэлийн Засаг дарга энэ асуудалд ямар байр суурьтай байна вэ? Нийслэлийн өмчит компаниудын ТУЗ нь 7-9 гишүүнтэй байдаг. Нийслэлийн ИТХ-ын төлөөлөгч тухайн компанийн дүрэмд заасны дагуу ТУЗ-д орж ажилладаг. Тэнд байгаа төрийн өмчит аж ахуйн нэгжүүдээ төлөөлөгч нар орж хянахгүй бол өмчийн эзний талаас хэн хянах гээд байгаа юм бэ? Хяналтын систем чинь зөв үү, буруу юу?” гэв.

Нийслэлийн ИТХ-ын дарга Д.Ихбаяр:

Нэр ус, зураг хөрөггүй хаягнаас нийслэлийн төрийн өмчит байгууллагуудын лого хаяг тэмдгийг тавиад төлөөлөгчдийн зураг хөрөгтэй, хэрхэн тооцоолж гаргасан нь мэдэгдэхгүй, төсөв, цалин авдаг гэсэн гүтгэлгийн шинжтэй мэдээ, мэдээлэл цахим орчинд явсан.

Төлөөлөгч нартаа болон иргэддээ хандаж, албан ёсны биш хаягаар цацсан мэдээлэлд шүүлтүүртэй хандаасай гэж хүсч байна. Бид үнэн бодит мэдээллийг ил тод тавина. Нууж хаагаад байх зүйл байхгүй. Хөрөнгө орлогын мэдүүлэгтээ манай төлөөлөгчид ямар компанийн ТУЗ-д, хэдэн төгрөгийн цалин урамшуулалтай ажилладаг вэ гэдгээ хуулийн дагуу тодорхой бичдэг. Нийслэлийн иргэдээс сонгогдсон Иргэдийн төлөөлөгчдийн хувьд иргэдийн өмчид хяналт хэрэгжүүлэхээр төлөөлж ажиллаж байгаа. Энэ нь Өмчийн удирдлагын тухай хууль, компанийн тухай хууль бусад хууль журам, компанийн дүрэмд заасны дагуу ажиллаж байна. Компани ТУЗ-ийн 9 гишүүнтэй байдаг. Гурав нь хараат бус. Өмчийн эзэн хяналт хэрэгжүүлэхээр нийслэлийн ИТХ-ын Төлөөлөгчдөөс 3 төлөөлөгч ордог. Үлдсэн 3 нь тухайн салбарын мэргэжилтэн байдаг. Энэ нь хуулиар зохицуулагддаг. Төлөөлөгчид ТУЗ-өөс гарья гэж байна. Гэтэл хяналтыг хэн хэрэгжүүлэх юм бэ. Энэ бол боломжгүй зүйл. Хуульд, компанийн дүрэмд өөрчлөлт оруулах шаардлагатай. Би ТУЗ-ийн гишүүн болъё гээд очсон хүн байхгүй. Нийслэлийн ИТХ-ын хуралдаанаар хэлэлцээд дэмжигдсэн төлөөлөгч очиж ажилладаг.

Нийслэлийн Засаг дарга бөгөөд Улаанбаатар хотын Захирагч Б.Пүрэвдагва:

Миний бие хуулийн дагуу үйл ажиллагаа явуулах, шийдвэр гаргах үүрэгтэй албан тушаалтан. Манай Нийслэлийн ИТХ-ын Төлөөлөгчдийн ажил хийж байгаа эсэх бүх хуулийн зохицуулалт маш тодорхой. Энд сууж байгаа нэг ч хүн хууль зөрчөөгүй. Би Нийслэлийн ИТХ-ын Төлөөлөгчөөр 2020-2024 онд ажилласан. Эргэж харах зүйлүүд бий. Нийслэлийн ИТХ-ын Төлөөлөгч бол маш олон хүний санал авч сонгогддог. Тэд 30,40,50 мянган хүний санал авсан учраас энэ хүмүүсийн асуудлыг шийдэх шаардлага байдаг. Гэтэл Төлөөлөгчид хуулиар олгогдсон ажил боломж нь хязгаарлагдмал.

Төлөөлөгч давхар ажил хийх эрх нь нээлттэй. Нийслэлийн өмчийн эзэн нь Нийслэлийн ИТХ байдаг. Өмчийн удирдлагын тухай хуулиар ТУЗ, УЗ-д байх бүрэн боломжтой. Хуулиар хориглосон зүйл байхгүй. Засаглалын асуудлыг өөрчлөх шаардлагатай бол хуульд нэмэлт, өөрчлөлт оруулах эрх нь УИХ-д бий.

Ер нь, Улаанбаатар хотын харьяанд байгаа 114 байгууллага, нийслэлийн өмчит компанийн бүтцийг эргээд харах шаардлагатай. Чиг үүрэг давхацсан, татан буулгах нэгж байна. Намар өөрчлөлт хийнэ гэж төлөвлөсөн. Засаг даргын хувьд хуулийн дагуу үйл ажиллагаа явуулна. Дахиад хэлэхэд энд сууж байгаа 45 төлөөлөгч ямар ч хууль дүрэм зөрчсөн зүйл байхгүй. Цалин хөлстэй холбоотой буруу зөрүү ойлголт явж байна. Хөдөлмөрийн хөлсний доод хэмжээгээр урамшууллаа авдаг. Зуу, зуун саяар нь авдаг тохиолдол байхгүй шүү. Манай санхүү, хөрөнгө оруулалтын газраас шаардлагатай данс тооцоог өгч болно. Иргэдэд ил тод нээлттэй мэдээллийг нь өгөөд явахгүй бол сонсголын үеэр маш буруу ойлголт төрүүлсэн. Тийм зүйл байхгүй гэдгийг хариуцлагатайгаар хэлье хэмээн байр сууриа илэрхийллээ.

Нийслэлийн ИТХ-ын Ээлжит бус XIII хуралдаанд Нийслэлийн 2026 оны Газар зохион байгуулалтын төлөвлөгөөнд нэмэлт, өөрчлөлт оруулах тухай, нийтийн эдэлбэрийн газрын хэмжээ хил заагийг тогтоох тухай асуудлыг Нийслэлийн Засаг даргын эдийн засаг дэд бүтцийн асуудал хариуцсан нэгдүгээр орлогч Б.Мөнхбат танилцуулав.

Төлөөлөгчид иргэдээс ирсэн газрын маргаантай болон нийтийн эдэлбэр газарт барилга байшин барьсан зэрэг асуудлаар Нийслэлийн Ерөнхий архитектор Б.Батцолмон болон нийслэлийн Газар зохион байгуулалтын албанаас тодрууллаа.

Мөн Налайхын барилгын материалын үйлдвэрлэл, технологийн паркийн өргөтгөлийн 130 га газрын хэсэгчилсэн ерөнхий төлөвлөгөөг батлах тухай Нийслэлийн ИТХ-ын тогтоолын төслийг батлав.