2006 онд Монголын иргэн Ш.Алтантуяа Малайз улсад бусдын гарт зэрлэгээр хөнөөгдсөн билээ. Түүний  аав Шарийбуу гуай өнөөдрийг хүртэл алуурчдыг цээрлүүлэх асуудлаар тус улсын хуулийн байгууллагад хандаж, өөрийн орны эрх баригчдад ч тодорхой хүсэлт, шаардлага тавьж байсан юм. Малайзын иргэн Багинда гэгч нь Ш.Алтантуяагийн үхэлд гол буруутай гэгдэж байсан боловч төрийн өндөр албан тушаалтнуудынхаа ивээлээр ялгүй үлдсэн байлаа. Багинда нь тухайн үед Африк, Ази, Европын орнуудтай зэвсгийн наймаа хийдэг “том гарын” гэмт этгээд байв.  Гэвч ялгүй яваа нь гайхмаар. Тэгвэл Малайзын Холбооны шүүх Ш.Алтантуяагийн амийг хөнөөсөн цагдаагийн хоёр ажилтанд цаазын ял оноожээ. Тэд дөрвөн жил гаруйн өмнө ялын дээд хэмжээгээр шийтгэгдсэн ч 2013 онд давж заалдах шатны шүүх нь цагаатгасан байсан юм. Тэдгээр гэмт этгээдүүд төрийн тэргүүн Селангорын Султанаас өршөөл гуйж, цаазын ялыг бүх насаар хорих ялаар солиулж магадгүй хэмээн Малайзын хэвлэлд бичжээ. Энэ хоёр этгээд нь Багиндагийн хамсаатан, аллагын үүрэг биелүүлсэн хүмүүс  гэдгийг уг нь Малайзын шүүхийн шүүгчид мэдэх л учиртай. Гэтэл Багиндатай ямар ч хамааралгүй мэтээр ийнхүү  шийдэж буй нь олны анхаарлыг зүй ёсоор татаж байгаа ажээ.

Б.Баяр 

Эх сурвалж: Tumen.mn