“Лалын улс”-ын хэт даврагсдын бүлэглэл барьцаалагдаад байсан хоёр дахь япон сэтгүүлч Кэнжи Готог өчигдөр цаазалж, амийг нь хороож буй бичлэгээ интернэтэд байрлуулсан байна. Энэ талаар BBC мэдээлжээ. “Японы засгийн газарт хүргэх илгээмж” хэмээн хаягласан энэ бичлэг цацагдсаны дараа Шинзо Абэ Үндэсний аюулгүй байдлын зөвлөлөө шуурхай хуралдуулсан байна.

Японы Ерөнхий сайд хэлэхдээ “Энэ бол хүн төрөлхтөний нийгмийн тогтсон ёс жамаас гажсан асар бүдүүлэг үйлдэл юм. Би асар их уур хилэн, жигшилтийг мэдэрч байна. Манай улс алан хядах үйлдлийн эсрэг тэмцэлд тууштай оролцохын зэрэгцээ энэ чиглэлд ажиллаж байгаа улс, байгууллагад гүн туслалцаа үзүүлэх болно” гээд “Манай засгийн газар барьцаалагдсан иргэдээ суллахын төлөө хийж болох бүхий л арга хэмжээг авсан ч үр дүнд хүрсэнгүй. Бидний уй гашуун, харамслыг хүлээн авна уу” гэж хэлжээ.

“Лалын улс”-ынхан он гараад Японы хоёр иргэнийг барьцаалснаа зарлаж, 72 цагийн дотор 200 сая ам.доллар төлсөн тохиолдолд тэднийг суллана хэмээн мэдэгдсэн. Тэд Харуна Юкаваг хороосныхоо дараа болзлоо өөрчилж, үлдсэн сэтгүүлчийг Йордан улсын шоронд хоригдож буй амиа золиослогч эмэгтэй ар-Рашиви гэгчтэй солилцох санал гаргаад байсан билээ. Японы засгийн газар, Иордан улс хамтран энэ чиглэлд тохиролцох боломжийг хайн нааштай хандлагууд ажиглагдаж байсан юм.

Эх сурвалж: Zaluu.com