Саяхан “Саусгоби сэндс” компанийн гурван хүнийг татвараас зайлхийсэн хэмээн буруутгаж  эрүүгийн хэргийн анхан шатны шүүхээс  ял оноосон. Үүнтэй холбогдуулан  Америкийг  талаас  манай хууль яналтын байгууллагыг “Хүний эрх зөрчлөө” хэмээж буй. Манай шилдэг нийтлэлч Баабар, Улсын баатар Э.Бат-Үүл нар ч эмзэглэж байгаагаа мэдэгдсэн. Баабар энэ тухай нийтлэлээ бичсэн бол Э.Бат-Үүл хорих 461 дүгээр ангид хоригдж байгаа Капла нарын тэдгээр гурван хүнийг эргэж очсон юм. Тэгвэл тус компанийн толгой компани болох “Саусгоби ресурс”-ийн удирдлагаас мөн “Бид хууль зөрчөөгүй” гэжээ.

Гурван жил гаруй шалгагдсан тэднийг анх АТГ-аас  “Авлига өгсөн” хэмээн мөрдөж байцаасан байдаг. Тэгээд удалгүй авлигын хэрэгт холбогдолгүй юм байна, харин мөнгө угаасан байж болзошгүй гээд  цагдаагийнхан шалгалтыг  үргэлжлүүлжээ.   Гэвч энэ нь бас л холбогдолгүй болов. Тэгтэл залгуулаад татвараас бултуулсан гэх 35 тэрбумын хэргээр шалгаж   ялласан байв. Ингэхдээ бараа бүтээгдэхүүнээ бусдад үнэ  төлбөргүй шилжүүлэн татвараас зайлхийсэн гэж үзжээ. Гэтэл “Саусгоби сэндс”-ийн өнөөгийн удирдлагууд нь гал гарсны улмаас 17 тэрбумын өртөг бүхий эксковатор зэрэг техник хэрэгслүүд шатсан гэж тайлбарлаж байна.  Мөн санхүүгийн  тайлангаа олон улсын стандартын дагуу хийж, 2007-2011 онд манай улсын татварын албанд 100 гаруй тэрбум төгрөг тушаасан гэж буй ажээ. Нөгөөтэйгүүр, зарим эх сурвалжууд  “Татварын ерөнхий газраас ямар нэгэн гомдол нэхэмжлэл гаргаагүй байхад эрүү үүсгэн шалгаж  ялласан” гэж байна. Эдгээрээс харахад Монголын шүүх,  прокурорынхон яадаг ч байсан  яллахын тулд л ялласан мэт. Гэхдээ гээндээ ч, гоондоо ч бий гэгчээр Канадад бүртгэлтэй энэ компанийн нөхөд  зөв зүгээр явж байгаад тус бүрдээ таваас дээш жилийн ял сонссон гэвэл  бас итгэмээргүй. 

Б.Отгонбаяр

Эх сурвалж: Tumen.mn