“Босоо Хөх Монгол” бүлгэм, “Ноён уулаа аваръя”  хөдөлгөөнийхөн өлсгөлөнгөө зогсоохыг хүссэнгүй. Өнөөдөр /2015 оны 2 дугаар сарын 17-ны өдөр/ Хэлмэгдэгсдийн хөшөөний дэргэд өлсгөлөн зарласан тэдний хэсэг нөхдийн ар гэрийнхэн ирцгээлээ. Энэ үеэр Чингэлтэй дүүргийн цагдаагийн албан хаагчид мөн тэдэн дээр ирэв. Цагдаа нар тус бүлгэм, хөдөлгөөний  удирдагчдын бичиг баримтыг шалгаж, автомашиндаа байрлуулсан туг, лоозонгоо буулгахыг  шаардсан боловч биелүүлсэнгүй. Үүнээс болоод  иргэд, цагдаа нарын дунд бяцхан маргаан өрнөсөн хэдий ч аль аль нь буулт хийлгүй тэгэсхийгээд  холдоцгоов.

Өлсгөлөн зарлаад хэвтэж буй хүмүүсийн биеийн байдал харьцангуй сайн байгаа тухай тэнд очсон эцэг  эчүүд болон хөдөлгөөн, бүлгэмийнхэн хэлж байлаа. “Босоо хөх Монгол”-ын тэргүүн Шинжээравдангийн аав Парчаа гуай эхнэрийн хамт  тэднийг эргэж ирсэн байв. Парчаа гуай “Шинжээравдан маань миний найман хүүхдийн хамгийн бага хүү юм. Дээрээ дөрвөн эгчтэй. Гурван хүүхэд минь эндсэн. Бид хүүдээ л санаа зовоод ирлээ. Ер нь би өдөр болгон ирж байгаа. Төр засаг нь анхаарч үзэх байх гэж найдаж байна. Ерөнхийлөгч Ц.Элбэгдорж уг нь Ноён уулаа хамгаалж авч үлдэнэ гэсэн юм билээ. Тиймээс  ямар нэгэн шийдвэртэй алхам хийх биз. Шинжээравдан хүү минь багаасаа  тэмцэгч чанартай, шударга хүмүүжилтэй өссөн хүн” гэж ярьж байсан юм.

Өлсгөлөн зарласан хүмүүс дээр өчигдөр УИХ-ын гишүүн Ж.Батзандан хүрч очсон тухай  тэнд байгаа хүмүүс   хэлж байна лээ.  Ж.Батзанданг гудамжинд тэмцэл хийгээд явж байсан  тэр жилүүдэд түүнтэй хамт зүтгэж явсан хүмүүсээс  тус бүлэм, хөдөлгөөнд  нэгдээд байгаа ажээ.

Б.Баяр