Швейцарийн Лозанна хотноо Ираны цөмийн хөтөлбөрийн талаар зарчмын тохиролцоонд хүрсний дараа Израйлийн эрх баригчид мэдэгдэл хийсэн юм. Үүний дараа Ерөнхийлөгч Б.Обама Израйль улсыг эрс шийдэмгий хамгаална гэдгээ илэрхийлсэн байна. Ерөнхийлөгч Б.Обама аль нэг улс орон Израйльтай хүч сорихыг оролдвол юуны түрүүнд АНУ-тай нүүр тулна гэдгийг өгүүлжээ. Иранд дэндүү их буулт хийж, Израйлийн аюулгүй байдлыг зольсон гэх шүүмжлэлд АНУ-ын Ерөнхийлөгч ийн хариу өгсөн байна. Б.Обама “Нью-Йорк таймс” сонинд өгсөн ярилцлагадаа, Намайг засгийн эрх барих хугацаанд эсвэл миний үйлдлийн улмаас Израйль улс эмзэг байдалд орвол би үүнийг өөрийн сүйрэл, Ерөнхийлөгчийн албан хаах хугацааны хамгийн том алдаа гэж үзнэ” хэмээн мэдэгдсэн аж. Түүнчлэн Б.Обама Израйлийн Ерөнхий сайд Б.Нетаньяхугийн зовинолыг ойлгож байгаагаа илэрхийлсэн байна. Израйлийн Ерөнхий сайдын байр суурийг АНУ-ын Конгрессын олон гишүүн дэмждэг. АНУ-ын Ерөнхийлөгч израйльчууд тус улсыг үгүй хийхээр нэг бус удаа заналхийлж, Холокостыг үгүйсгэдэг Ираны талаар санаа зовинох бүрэн эрхтэй гэдгийг хэлжээ. Б.Обама сүүлийн өдрүүдэд Ойрхи Дорнод өөрийн хамгийн гол холбоотон улсын эрх баригчдыг тайвшруулах гэж хоёр дахь удаагаа мэдэгдэл хийсэн нь энэ аж. Гэсэн хэдий ч тэрбээр Ираны цөмийн хөтөлбөртэй холбоотойгоор Израйлийн эрх баригчдын дэвшүүлсэн шаардлагыг хэрэгжих боломжгүй гэж үзжээ. Израйлийн эрх баригчид Ираны цөмийн хөтөлбөрийн тухай хэлэлцээрт оролцож буй зургаан орныг Иранд шахалт үзүүлж, Израйль улсыг дипломат шугамаар хүлээн зөвшөөрүүлэхийг шаардсан юм. “Бид Ираныг цөмийн хөтөлбөрөөс нь татгалзуулж, Израйль улсыг хүлээн зөвшөөрүүлж чадна гэсэн төсөөлөл нь Ираны дэглэмийг бүрэн өөрчлөгдөхөөс нааш бид гэрээнд гарын үсэг зурж чадахгүй гэдгийг хүлээн зөвшөөрсөнтэй адил юм” хэмээн Б.Обама Израйлийн эрх баригчдын байр суурийг шүүмжилсэн байна. Ираны цөмийн хөтөлбөрийн асуудлыг НҮБ-ын Аюулгүйн Зөвлөлийн таван гишүүн дээр Герман улсыг оролцуулан хэлэлцэж байгаа юм.