Монгол Улс, Япон Улсын хооронд дипломат харилцаа тогтоосны 43 жилийн ой энэ онд тохиож байгаа. Хэдийгээр 1990 он хүртэл хоёр орны харилцаа нийгмийн байгуулал, үзэл суртлын ялгаанаас үүдэн дорвитой хөгжих боломж хязгаарлагдмал байсан хэдий ч Монгол улсад ардчилсан хувьсгал өрнөхөд Япон улс дэлхийн аль ч орноос түрүүнд, тууштай дэмжиж ирсэн.
Тэр ч утгаараа Япон Улсын засгийн газар 1991 оноос тус улсын Хөгжлийн албан ёсны тусламжийн хөтөлбөрт Монгол улсын хамруулж хүнс, нийтийн тээвэр, холбоо, эрчим хүч, боловсрол, эрүүл мэнд, соёл бүхий л салбарт зээл, тусламж үзүүлж ирсэн.
24 жилийн турш Их наран улсаас Монгол улсад эм эмнэлгийн тоног төхөөрөмж бэлэглэх, боловсролын тэтгэлэгт хамруулах, утааг арилгах хөтөлбөр зэрэг асар олон төсөл хэрэгжүүлсэн. Харин Монгол улс ядуу буурай орны индексээс хөгжиж буй орны тоонд үсрэн орсон тул Монгол улсад үзүүлэх буцалтгүй тусламжаа энэ удаагийнхаар зогсоохоор шийдсэн байна.
Тэгвэл, Монгол улсад олгох Япон Улсын хамгийн сүүлчийн буцалтгүй тусламж нь "Монгол-Японы сургалтын эмнэлгийг барьж байгуулах төсөл", "Хүний нөөцийг хөгжүүлэх тэтгэлэг" байгаа юм. Төслийг хэрэгжүүлэх тухай хоёр орны Ноот бичиг, буцалтгүй тусламжийн хэлэлцээрт өнөөдөр Монгол улсын Гадаад хэргийн сайд Л.Пүрэвсүрэн, Япон Улсаас Монгол Улсад суугаа Элчин сайд Т.Шинзо нар гарын үсэг зурахаар болжээ.
Б.Хишигдэлгэр
