Манай улс сүүлийн жилүүдэд ялтан шилжүүлэх гэрээг нэлээд  хэдэн улс оронтой байгуулаад байгаа. Хятад улстай хийсэн энэ гэрээний дагуу тэнд хоригдож байсан ялтануудын түрүүчээс эх орондоо шилжиж ирж байна.  Казахстаны шоронгоос  мөн нэг  иргэнээ  татаж авав. Одоогоор гадаадын 19 улсын шоронд манай 165 хүн хоригдож байна. Тэдний дунд цаазаар авах ялтай хүн ч бий. Ийм ялтай хүмүүсийг эх оронд нь шилжүүлэх асуудал ихээхэн бэрхшээл дагуулж буй ажээ. Ялангуяа Хятадын тал цаазын ялтай хоригдолыг  шилжүүлэх дургүй байдаг байна. Харин манай Гадаад хэргийн яамнаас  энэ талаар идэвхтэй хөөцөлдөж байгаа аж. Хэдэн жилийн өмнө Хятадад хар тамхи тээвэрлэсэн хэргээр баригдаж, цаазын ял авсан н.Дамдинг Ерөнхийлөгч Ц.Элбэгдорж өөрийн биеэр хөөцөлдөн, захидал бичиж байж арай хийж цаазлуулалгүй үлдээсэн юм. Түүний  ялыг  Хятадын шүүх дараа нь бүх насаар хорих ялаар сольсон байлаа. Тэгвэл одоо манай улсын зүгээс  Дамдинг эх оронд нь шилжүүлж авчрах талаар Хятадын талтай ярилцаж байгаа ажээ.

Б.Баяр 

Эх сурвалж: Tumen.mn