Таван толгойн хөрөнгө оруулалтын гэрээний төслүүдийг УИХ-аар  хэлэлцэх эсэхийг  шийдэж чадаагүй л байна.  УИХ-ын гишүүн Л.Эрдэнэчимэгийн ахалсан  ажлын хэсэг  уг төслүүдийг УИХ-аар хэлэлцэх эсэхэд дүгнэлт гаргахыг хүлээцгээж байгаа аж.  Энэ ажлын хэсэгт парламентад суудалтай намуудын төлөөлөл багтаж буй. МАХН-аас  О.Баасанхүү байгаа. Тэрбээр сүүлийн үед их л омогшиж, “Болохгүй бол Ерөнхий сайд Ч.Сайханбилэгийг   огцруулна” хэмээн ханцуй шамлан таахалзах болжээ.  Ингэж огцом  дуугарах шалтгаан нь Солонгост  эмчлүүлж байгаа Н.Энхбаярын намынхаа  нөхдөд илгээсэн даалгавар бололтой.   Н.Энхбаярын хувьд  “Таван толгойг ард түмэндээ өгнө” гэсэн хатуу байр суурьтай хэвээрээ  ажээ. Гэвч Таван толгойн хөрөнгө оруулалтын гэрээний төсөлд  түүний энэ санаа бараг байхгүй, алсдаа  “Энержи ресурс”-ийн  хувьчлалд шилжүүлэх нөхцөлтэй тул Н.Энхбаяр УИХ-д суугаа өөрийн намынхныг дайчилж, Засгийн газрын эсрэг “тэмцэл”-д босгох ажлаа О.Баасанхүүгээр гүйцэтгүүлэхийг хичээж байна. О.Баасанхүү нь Ч.Сайханбилэгийг огцруулах  гарын үсэг цулгуулаад явж буй.  Одоогоор түүний энэ “санаачлагыг” дэмжиж дөрөв,  таван гишүүн гарын үсгээ зурсан сурагтай. Ойрын үед МАН-ын зарим гишүүд зурах болов уу. Хамгийн түрүүнд УИХ, Засгийн газар тарах хэрэгтэй гээд байгаа Ж.Энхбаяр зэрэг  гишүүд О.Баасанхүүтэй нэгдэж магадгүй гэж зарим эх сурвалжууд хэлж байна. Гэхдээ УИХ-ийн гишүүдийн дунд   “Энержи ресурс”-ийн нөлөө их. Сү.Батболд гишүүн лав МАН-ынхаа бусад нөхдийн амыг хамхиж  таарна. УИХ-ын дарга З.Энболд  АН-ын даргын хувьд сонгууль болохоос нэг жилийн өмнө өөрийн намаас тодорсон  Ерөнхий сайдыг унагахыг хүсэхгүй нь тодорхой.  Иймд О.Баасанхүү гишүүн “Их удирдагч”-ийнхаа  даалгаврыг биелүүлж чадахгүй л болов уу.

Б.Баяр 

Эх сурвалж: Tumen.mn