Нисэх хүчин, иргэний нисэхийн салбарын нийт хамт олон, үе үеийн ахмадууд та бүхэндээ Монгол Улсад нисэх хүчин үүсч хөгжсөний 90 жилийн ой, Иргэний агаарын тээвэрчдийн баярын мэндийг дэвшүүлж, эрүүл энх, аз жаргал, сайн сайхан бүхнийг хүсэн ерөөе.
Тэртээ 1925 онд Монгол Улсад анхны агаарын хөлөг газардсанаар нисэх хүчин үүсч хөгжсөн гэж түүхэнд тэмдэглэгдсэн байдаг. Өнөөдөр түүхэн замналынхаа 90 жилийн ойтой золгож байгаа манай иргэний нисэхийн салбар нь Монгол Улсын гадаад ертөнцөд гарах гол гарц төдийгүй хөрөнгө оруулагчдыг татах, жуулчдад үйлчлэхэд ихээхэн хувь нэмэр оруулагч, Монгол Улсын эдийн засгийн онцгой салбарын нэг болж чадсан байна. Зөвхөн сүүлийн 5 жилд гэхэд агаарын тээврээр 4 сая 800 мянга гаруй зорчигч, 700 мянган тонн ачаа тээвэрлэж, Монгол Улсын нутаг дэвсгэр дээгүүр дамжин өнгөрсөн 400 мянга гаруй олон улсын нислэгт үйлчилгээ үзүүлж, 40 мянган агаарын хөлөг бууж хөөрч, 652 тэрбум төгрөгийн орлого олж, улсын төсөвт 260 тэрбум төгрөгийг төвлөрүүлсэн нь иргэний нисэхийн салбарын нийгэм, эдийн засагт эзлэж буй өнөөдрийн байр суурийг илтгэж байна.
Монгол Улс 1989 онд Олон улсын иргэний нисэхийн тухай конвенцид нэгдэн орсон гишүүн улсын хувьд Олон улсын иргэний нисэхийн байгууллага төдийгүй БНХАУ, ОХУ, БНСУ, БНТУ, Тайланд, Япон болон бусад улсуудын иргэний нисэхийн байгууллага, агаарын тээврийн үйлчилгээ үзүүлэгч байгууллагуудтай нягт хамтран ажиллаж, цаашид ч олон улсын агаарын харилцааны хамтын ажиллагаагаа өргөжүүлэх, үр өгөөжийг дээшлүүлэх талаар шаргуу ажиллах болно.
Анхны олон улсын нислэг ОХУ-ын Улаан-Үүд хотоос эхлэж байсан бол өнөөдөр Монгол Улс 38 улстай агаарын харилцааны хэлэлцээр байгуулж, олон улсын нислэгийн сүлжээгээ өргөтгөн Монголын агаарын тээвэрлэгчид 8 улсын 12 чиглэлд жилд дунджаар 4000 гаруй нислэг үйлдэж байна.
Монгол Улсын Засгийн газраас олон улсын стандарт шаардлагад нийцсэн нисэхийн аюулгүй ажиллагаа, аюулгүй байдлыг хангасан эдийн засгийн үр ашигтай, өрсөлдөх чадвар бүхий иргэний нисэхийн үйлчилгээ үзүүлэх зорилтуудыг тавьж, иргэний нисэхийн эрх зүйн шинэчлэлтийг амжилттай хэрэгжүүлж байна.
Иргэний нисэхийн аюулгүй ажиллагаа, аюулгүй байдал, агаарын навигаци, нисэх буудал, агаарын тээвэр, хүний нөөцийн хөгжил зэрэг нисэхийн үйлдвэрлэл үйлчилгээний бүхий л хүрээг хамарсан, хүрэх зорилго, зорилтыг тодорхойлсон “Төрөөс иргэний нисэхийн салбарт 2020 он хүртэл баримтлах бодлого”-ыг Улсын Их Хурлаас 2013 онд батласан нь энэ салбарын хөгжлийн шинэ хандлагыг тодорхойлсон түүхэн үйл явдал болсон юм.
Энэхүү бодлогын хүрээнд Засгийн газраас иргэний нисэхийн салбарын эрх зүйн шинэтгэлийн ажлыг эрчимжүүлж, олон улсын худалдаа, тээвэр логистикийн нэгдсэн сүлжээнд нэгдэж, олон улсын зах зээлд өрсөлдөх чадвараа дээшлүүлэх, агаарын тээврийг бусад тээврийн системтэй уялдуулан нэгтгэн хөгжүүлэхэд чиглэсэн Тээврийн ерөнхий хуулийг шинээр боловсруулж, үүнтэй нийцүүлэн Иргэний нисэхийн тухай хуулийг шинэчлэн найруулж, усад холбогдох эрх зүйн актуудыг батлуулахад бэлэн болгоод байна.
Үүний зэрэгцээ Засгийн газрын хэрэгжүүлэгч агентлаг-Иргэний нисэхийн ерөнхий газрын хэрэгжүүлж байсан агаарын навигаци, нисэх буудлын үйлчилгээ, бусад аж ахуйн үйл ажиллагаатай холбогдох чиг үүргийг хариуцан хэрэгжүүлэх “Иргэний нисэхийн үндэсний корпораци” аж ахуйн тооцоотой үйлдвэрийн газар байгуулах шийдвэрийг Засгийн газар өнгөрсөн дөрөвдүгээр сард гаргасан нь салбарын эдийн засгийн үр ашгийг нэмэгдүүлэх, шинэ орлогыг бүрдүүлэх боломжийг бий болгох төдийгүй иргэний нисэхийн салбарт төр, хувийн хэвшлийн оролцоог дэмжиж, агаарын тээврийн үйлчилгээг өмчийн олон хэлбэртэй, чөлөөт өрсөлдөөнтэй болгоно гэж үзэж байгаа юм. Энэхүү бүтцийн өөрчлөлт нь төрийн бодлого, зохицуулалтыг аж ахуйн үйл ажиллагаанаас салгаж, олон улсын жишигт нийцсэн зах зээлийн харилцааны сонгодог зарчимд шилжүүлсэн шинэчлэлийн бас нэгэн чухал алхам болж байна.
Иргэний нисэхийн салбарын хөрөнгө оруулалтын хэмжээ жилээс жилд өсч, агаарын навигацийн болон нисэх буудлуудын дэд бүтцийг сайжруулахад сүүлийн 5 жилд гэхэд 150 тэрбум гаруй төгрөг зарцуулсан байна. Хамгийн том хөрөнгө оруулалт бол жилдээ 3 сая зорчигчдыг нэвтрүүлэх хүчин чадалтай, 617 сая ам.доллараар барьж байгуулж байгаа Улаанбаатар хотын Олон улсын нисэх онгоцны шинэ буудлын бүтээн байгуулалт бөгөөд энэхүү нисэх буудлыг 2016 онд багтаан ашиглалтанд оруулахаар эрчимтэй ажиллаж байна.
Улс орны хэмжээнд нийгэм, эдийн засгийн бүхий л салбарын хөгжлийг хангах, ялангуяа тэргүүлэх чиглэлийн салбаруудад удаан хүлээгдсэн асуудлуудын гарцыг олж, улс орондоо шинэ шинэ хөгжлийн шанг татахаар Шийдлийн Засгийн газар эрчимтэй ажиллаж байна. Энэхүү үйлсэд нэгдэж, иргэний нисэхийн салбарыг хөгжүүлэх шинэ сорилтыг амжилттай даван туулахад салбарын ажилтан ажиллагсад та бүхний мэдлэг оюун, хүч хөдөлмөр, идэвх санаачлага тулгуур багана нь байж, бид хамтдаа дэвшилд хүрч чадна гэдэгт итгэлтэй байна.
Та бүхний маань ажил үйлс шинэлэг санаа, шинэ амжилтаар дүүрэн байх болтугай.
ЗАМ, ТЭЭВРИЙН САЙД Н.ТӨМӨРХҮҮ
Эх сурвалж:
