Хөгжлийн банкны хэрэгт холбогдсон албан тушаалтнууд бүгд гурван шатны шүүхээр орж, зарим нь цагаадаж, зарим нь бүр ялаа эдэлж дуусан эхнээсээ гарч ирцгээжээ. Хамгийн сүүлд УИХ-ын гишүүн Д.Цогтбаатарт холбогдох хэргийг Улсын дээд шүүх 2024 оны 12 сарын 11-ны хуралдаанаараа хянан хэлэлцээд, анхан шатны шүүхийн шийдвэрийг хэвээр үлдээсэн юм. Ингэснээр Д.Цогтбаатарын нийтийн албанд ажиллах эрхийг 2 жилээр хасч, 20 сая төгрөгийн торгуулийн шийтгэл ногдуулсан байдаг.

Гэвч 80 гаруй албан тушаалтан, 4 аж ахуйн нэгжид холбогдсон энэ том хэргээс хоёрхон хүн шүүхийн босгоор алхалгүй “уснаас хуурай” гарч чаджээ. Тэд бол УИХ-ын гишүүн Ганбямбын хүү Дөлгөөн, мөн Ерөнхийлөгчийн Тамгын газрын дарга асан, МАН-ын Ерөнхий нарийн бичгийн дарга Я.Содбаатарын төрсөн ах Я.Сод-Эрдэнэ нар юм.

УИХ-ын гишүүн Д.Цогтбаатар 2025 оны 3-р сарын 24-нд хэвлэлд өгсөн ярилцлагадаа “Миний дээд талын албан тушаалтан болох Янгугийн Сод-Эрдэнэ, Ганбямбын Дөлгөөн нарын хүмүүс хариуцлага хүлээгээгүй. Миний дээр байсан албан тушаалтнуудад нөхцөл байдал өөрөөр үйлчилсэн” хэмээн мэдэгдсэн нь учиртай.

Хэрэв Д.Цогтбаатар буруутай нь үнэн юм бол, түүний дээд албан тушаалтан болох Хөгжлийн банкны Хяналт шалгалт, Тамгын газрын захирал асан Я.Сод-Эрдэнэ ч адилхан хуулийн өмнө очиж хариуцлага хүлээх ёстой. Энэ бол хууль хүн бүрт тэгш үйлчлэх зарчим.

Гэтэл бодит байдал дээр Д.Цогтбаатарын хэрэг эцэслэн шийдэгдэж, ял авсан байхад Я.Сод-Эрдэнийн хэрэг АТГ-ын санал, прокурорын шийдвэрээр “тусгаарлагдсан” нэрийн дор шүүхээр ч хэлэлцэгдсэнгүй. Энэ бол Монголд дарга анги, тэдний төрөл төрөгсдөд зориулсан “давхар стандарт” амьдрал дээр хэрхэн хэрэгжиж буйг харуулсан тод жишээ.

Ядаж л өнөөг хүртэл хууль хяналтын байгууллагуудын зүгээс “Я.Сод-Эрдэнэд холбогдох хэргийг яагаад, ямар хугацаагаар, ямар нотолгоо дутсан учраас тусгаарласан” талаар олон нийтэд хандсан ганц ч тайлбар өгсөнгүй. Энэ асуудал өдгөө таг чиг болж, мартагдах шатандаа орсон нь бүр ч ноцтой.

Ийм нөхцөлд Я.Сод-Эрдэнэ Ерөнхийлөгчийн Тамгын газрын дарга асан, өнөөгийн МАН-ын Ерөнхий нарийн бичгийн дарга Я.Содбаатарын нөлөөгөөр хэргээ тусгаарлуулан, уснаас хуурай гарсан уу гэдэг эргэлзээ үүсэх нь зайлшгүй юм. Энэ бол нотлогдоогүй таамаг. Гэвч иргэдэд ингэж хардах эрх бий.

Иймээс АТГ, Прокурорын байгууллагын зүгээс энэхүү хардлагыг нэг мөр дуусгавар болгож, Я.Сод-Эрдэнэд холбогдох хэрэгт юу тохиолдсон, ямар үндэслэлээр шүүхэд шилжээгүй, цаашид хэрхэх эсэх талаар баримт нотолгоотойгоор тодорхой мэдээлэх үүрэгтэй.

Эцэст нь дүгнэхэд, Д.Цогтбаатарт оноосон ял бол Монголд “хууль үйлчилдэг” гэдгийг тодорхой харуулж байна. Харин түүний дээд албан тушаалтан болох Я.Сод-Эрдэнийн хэрэг "тусгаарлагдсан" гэдэг халхавчийн дор усанд хаясан чулуу мэт алга болсон нь “хууль хүн бүрт тэгш үйлчилдэг” гэсэн зарчим алдагдсаны тодорхой жишээ юм. Учир нь нэг хүнд үйлчилсэн хууль яг адилхан үйлдэлтэй нөгөө хүнд нь үйлчлэхгүй байж таарахгүй шүү дээ.

Эх сурвалж: NEWSTV.MN