Одоогоос хорь гаруй жилийн өмнө хослон дуулаачдыг магнайлж байсан хоёр бол яах аргагүй У.Далантай, С.Эрдэнэцэцэг нар билээ. Тэд 23 жилийн дараа хамтарч “Сэтгэлийн үг” цомгоо өлгийдөн авч улмаар уг цомгийнхоо нэрээр нэрлэсэн тоглолтыг нийслэлд хоёр ч удаа тоглон, үргэлжлүүлээд орон нутаг руу хүлгийн жолоо залсан байгаа. 

Гавьяат жүжигчин У.Далантайг дуурийн дуучин гэдгээр нь бус зохиолын дуугаар нь сонсогчид андахгүй дээ. Гэтэл тэрбээр УДБЭТ-т хэдэн жил гоцлол дуучнаар ажилласан бөгөөд 2009 онд дуурийн хаалгыг хаагаад гарч байсанд мэргэжил нэгт нөхдүүд нь ихэд харамсаж байсан гэдэг. Тэрбээр тэнд ажиллаж байхдаа олон улсад оролцсон уралдаан тэмцээнүүдээсээ үргэлж шагналт байр, бүр “Гран при”-г хүртэж, авч байсан одтой хийморьтой нэгэн явжээ. 

Тухайн үед яагаад ягаан театраас гарах болсон шалтгаанаа тэрбээр “Тухайн үеийн театрын удирдлагуудтай үл ойлголцол үүссэн. Намайг их шахдаг байсан. Тэгээд ч би залуу хүн, шазруун зантайдаа гарсан даа. Гэхдээ би их зүйлийг ойлгож, хүмүүсийг таньж авсан болохоор түүндээ харамсдаггүй, харин ч олзуурхдаг” хэмээн ярьжээ. 

Өнгөрсөн жил УДЭТ-ын захирлын сонгон шалгаруулалт явагдахад таван хүн өрсөлдөөд онооны дүнгээр У.Далантай тодрон гарч ирсэн ч Соёлын сайд Ц.Оюунгэрэл хууль зөрчиж, одоогийн дарга Мөнхзулыг томилсон гэдэг. Төрийн албаны хууль дүрмээр бол У.Далантай сонгогдох байсан ч хууль бус томилгоог салбар хариуцсан сайд нь тийнхүү хийчихжээ. 

Одоо эл асуудал шүүхийн байгууллагаар явж байгаа юм билээ. Хэрвээ шүүх үнэн зөв шийдвэр гаргавал тэрбээр дуурийн театрыг удирдах юм. 

Түүнийг урлаг, соёлын салбарынхан хэтэрхий шударга нэгэн гэж тодорхойлдог бөгөөд дарга хийх чадвар бүрэн бий гэдгийг үеийн уран бүтээлчид нь ч онцолдог юм.

Эх сурвалж www.wikimon.mn