Иракын Батлан хамгаалахын хүчин олон тооны байлдааны хэрэгслээ “Исламын улс” алан хядах бүлэглэлд алдсан тухай “Guardian” сайт мэдээллээ.  Иракын Ерөнхий сайд Хайдер ал-Абади өчигдөр ярилцлага өгч байхдаа байлдааны хор хохирлын тухай ярьсан нь олны анхаарлыг татлаа.

Хайдер ал-Абадийн хэлснээр “Исламын улс”-ынхан өнгөрсөн оны 6 дугаар сард Мосул хотыг эзэлснээс хойш Иракын хүчин нийт 2300 Humvee байлдааны машинаа тус бүлэглэлд алджээ. Мөн тэрээр Humvee байлдааны машин нь хэрхэн тоноглогдсон, хуяглагдсан гэдгээсээ шалтгаалан үнэ нь янз бүр байгааг тэмдэглээд, хэдий тийм ч асар их хэмжээний гарз хохирол гарсныг онцолжээ.

Өнгөрсөн жил АНУ-ын Төрийн Департмент Иракт 1000 Humvee машинаас гадна бусад дагалдах бага оврын зэсвгүүдийг оролцуулаад нийт 579 сая ам.долларын худалдааг баталсан билээ.

Humvee нь АНУ-ын байлдааны Hummer машины дараагийн загвар юм. Уг машин нь 200 морины хүчтэй, 4 цилиндр хөдөлгүүртэй, 6 араа бүхий автомат хурдны хайрцагтай, түлш зарцуулалтыг 70 хувиар бууруулсан шинэ хөлөг билээ. Humvee нь дотроо тусгай зориулалтын суудал, албан хаагч тус бүрийн зэвсэг, тусгай хэрэгслийг тогтоогч бүхий хаалга, газрын зураг бүхий GPS болон бусад тусгай хэрэгслээр тоноглогдсон хамгийн сүүлийн үеийн хуурай замын цэргийн байлдааны хуягт машин аж. Мөн уг машин нь сумнаас хамгаалагдсан их бие, цонхтой гэдгээрээ давуу талтай юм байна.

Г.Үжин