Үндэсний их баяр наадам цагаан сарын үеэр үндэсний томоохон үйлдвэрлэгчдийн гурил урсч, олон ч хүний нүүрийг түлж, уурыг барсан түүхтэй. Үүнийгээ нэр бүхий бизнес эрхлэгчид үйлдвэрлэлийн горим алдагдсанаас боллоо хэмээх эвтэйхэн тайлбараар тахлаад өнгөрсөн бол зах зээлийн шалгарлаар “Өег”, “Хурх” тэргүүтэй шинэ үйлдвэрүүд хэрэглэгчдэд чанараараа танигдах боломжийг бүрдүүлсэн гэхэд хилсдэхгүй. Тэгвэл манай сурвалжлах багийнхан 21 аймгаар тойрч, аймаг орон нутгийн бүтээн байгуулалт, өв соёл, үйлдвэрлэлтэй танилцах явцад Дархан-Уул аймгийн “Өег” гурилын үйлдвэртэй танилцах боломж тохиолоо.
Гэтэл биднийг хамгийн сүүлийн үеийн техник технологиор өвч бүрэн тоноглогдсон таван давхар үйлдвэр, гадны экспертүүдээр ахлуулсан монгол инженерүүд угтан авсан бөгөөд үйлдвэрийнхээ ширхэг бүртэй танилцуулах явцдаа эх орондоо Итали технологийг нэвтрүүлж чадсан гэдгээ тун бахархалтайгаар танилцуулж явсан юм. Түүнчлэн тус үйлдвэр нь бүрэн автоматжсан бөгөөд дэлхийн чанарын стандартад бүрэн нийцсэн бүтээгдэхүүн үйлдвэрлэдэг гэдгээрээ ихээхэн онцлогтой чанагдаж байсныг нуух юун.
Энэ үеэр үйлдвэрийн ерөнхий менежер Ж.Булгантамир, технологич мэргэжилтэн Ибрахим Гулечээс зарим тодруулгыг авлаа.
Ерөнхий менежер Ж.Булгантамир: Манай компани хоногт 150 тонн улаан буудай тээрэмдэх
хүчин чадалтай. Нийтдээ 40 мянган тонн улаан буудай хадгалах эловатртайгаар анх төсөлд тусгагдсан бөгөөд өнөөдрийн байдлаар үйлдвэр маань бүрэн хэмжээгээр ашиглалтад орж, тасралтгүй үйл ажиллагаа явуулж байна. Нийтдээ 20 мянган тонн улаан буудай хадгалах эловатрыг ашиглалтад оруулан, цаашид бусад цогц системүүдийг барьж ашиглалтад оруулахаар зорьж ажиллаж байгаа болно. Үүнд, автомашинаар будаа буулгах авто өргөгч, вагоноос будаа буулгах, ачих хэсгүүд, хатаалга болон цэвэрлэгээний цогц систем, бусад нэмэлт улаан буудай хадгалах эловатруудыг барьж байгуулах ажлууд багтаж байгаа юм.
- Яагаад заавал эх орондоо Итали технологийг нэвтрүүлэхээр зорив?
- Ерөнхийдөө анх үйлдвэрийг барьж ашиглалтад оруулахын тулд хамгийн орчин үеийн байгальд ээлтэй дэвшилтэт технологийг хайж, судалгаа шинжилгээ хийж нэлээд ажил болсон. Ингээд жил гаруй судалгаа явуулсны дүнд дэлхийн хамгийн олон улс оронд хэрэглэгддэг Турк тоног төхөөрөмж, Итали технологийг нэвтрүүлэхээр сонгож авсан юм.
Түүнийхээ ч үр шимийг хүртэж байна гэхэд болно. Учир нь манай үйлдвэрлэсэн гурил хэрэглэгчдийн сайшаалыг маш их хүртэж байгаа бөгөөд зах зээл дээр ч тун эрэлттэй болоод байна. Тиймээс цаашдаа ч үйлдвэрлэлийнхээ нэр төрлийг улам олшруулна гэсэн зорилго тавиад байна.
- Ингэхэд “Өег” гурил хэчнээн нэр төрлөөр үйлдвэрлэгдэж байна вэ?
- Ерөнхийдөө дээд гурил, нэг, хоёрдугаар гурилыг л үйлдвэрлэж байна. Гэсэн хэдий ч дотоодын зах зээлийн 20 хувийг, Дархан-Уул аймгийнхаа 40 хувийг дангаараа хангаж байгаа.
- Технологич мэргэжилтэн Ибрахим Гулеч: Миний хувьд гурилын технологич инженерээр 28 жил тасралтгүй ажиллаж байна. Тэр дундаа 20 гаруй улсад ажиллаж байгаа бөгөөд сүүлийн гурван жил Монгол Улсад ажиллаж байгаа болно.
- Ерөнхийдөө миний хувьд Итали технологийн давуу талыг ашиглан, Монголд ургадаг улаан буудайнуудаас хамгийн сайн чанарын гурил хийх гэж ирсэн. Манай гурил дэлхийн стандартын дагуу экспортод гаргахад нийцсэн, чанартай, органик бүтээгдэхүүн. Үүнийг техник тоног төхөөрөмж болоод технологийн давуу тал гэж хэлэхэд болно. Муу буудай байсан ч Итали технологи, Турк тоног төхөөрөмжөөр хамгийн сайн чанарын гурилыг үйлдвэрлэж болдгоороо маш онцлог юм.
- Ярилцсанд баярлалаа.
Б.Хишигдэлгэр
