УИХ-ын гишүүн асан Н.Номтойбаяр энэ удаагийн сонгуульд УИХ-ын 29 дүгээр тойрогт бие даан нэр дэвшсэн. Гэвч түүнийг “мөрдөн байцаагчийг дарамталсан” гэх үндэслэлээр цагдан хорьсон учраас өнөөдөр нэр дэвшигчдэд олгосон нэр дэвшигчийн үнэмлэхийг нь түүний аав Б.Нямтайшир гардан авлаа. Энэ үеэрээ тэрээр хүүгийнхээ болон сонгуулийн талаар өөрийн байр сууриа илэрхийлсэн юм.
“Би эцэг хүний хувьд олон нийтэд нэг зүйлийг хэлмээр байна. Монгол Улсад үйлчилж байгаа хууль тогтоомжийн хүрээнд асуудлыг шийдвэрлэн, хуулийн зүйл, заалтыг тууштай шударга баримталсан СЕХ-ны дарга, гишүүдэд талархлаа илэрхийлж байна. Анх удаа хүний эрхийг зөрчиж, нэр дэвшигчийн тогтоолыг гардаж авсан байхад нь цагдан хорих шүүхийн шийдвэр гарсан нь Сонгуулийн тухай хуулийн 35.2-р зүйл заалтыг зөрчсөн үйлдэл болсон. Ардчилсан Үндсэн хуулиа дээдлэн тунхагласаар өдгөө 28 жил болж байна. Манай ард иргэд, төдийгүй дэлхий нийт Монголыг ардчилсан улсын манлайд эрэмбэлдэг. Харамсалтай нь ардчилсан нийгэмд анх удаа төрийн эрх барих дээд байгууллагад нэр дэвшигч шоронгоос сонгуульд өрсөлдөхөөр болж байна. Энэ бол түүний эрх чөлөөг боомилоод зогсохгүй, Хан-Уул дүүргийн 120 гаруй мянган иргэдийн сонгох эрхэд халдсан үйлдэл боллоо. Эрх мэдэлтний үгийг хууль мэт ойлгож, түүнийг хэрэгжүүлдэг гажуудал Монголын нийгэмд нэгэнт тогтжээ. Ардчилсан улс оронд ийм зүйл байдаггүй, байх ч ёсгүй. Шүүх засаглал нь хараат бус, ёс зүйтэй байх ёстой. Монголд үгээр нь яваагүй намын гишүүнээ, үнэн төрхийг нь илчилсэн иргэнээ, төрдөө хоёргүй сэтгэлээр ажилласан зүтгэлтнээ барьдаг, хорьдог жишиг нэгэнт тогтжээ. Өнгөрсөн зуунд Монголын түүхэнд тохиолдсон бүх хэлмэгдүүлэлтэд миний өвөө, аав, би ч өөрөө өртөж явсан. Хэлмэгдүүлэлт ямар их гай зовлон авчирдгийг Монголын ард түмэн мэднэ. Энэ цаг 20-р зуунтай төгсгөл болсон гэж би бодож байсан. Гэтэл өнөөдөр өндөр, нарийн зохион байгуулалт бүхий шинэ цагийн хэлмэгдүүлэлт ирж байгаа юм байна. Энэ хэнийг ч ялгалгүй биднийг бүгдийг дайрах магадлалтай. Хэрэв хүүг минь улс төрийн зорилгоор суллахгүй бол түүний дуу хоолой болж, сонгуулийн компанит ажилд нь би идэвхийлэн оролцоно. Миний хүүг дэмжсэн, дэмжиж байгаа Хан-Уул дүүргийн иргэд, түүний дотор МАН-ын эгэл жирийн гишүүд та бүхэнд гүнээ талархаж байна. Сонгогч та бүхний сонголт мэргэн байх болтугай” гэсэн юм.
Мөн өмгөөлөгчийнх нь мэдэгдсэнээр, хэдийгээр Н.Номтойбаяр цагдан хоригдож байгаа ч өмгөөлөгчөөрөө дамжуулан сонгуулийн сурталчилгаагаа хийсээр байх юм байна.
