Бямба гарагт АНУ-ын ерөнхийлөгч Дональд Трамп өөрийн найз, холимог тулааны UFC холбооны тэргүүн Дана Уайтад хэвлэлийн төлөөлөгчөөр Цагаан ордонд ажиллах санал тавьснаа мэдэгджээ.

Энэ нь уламжлалт хэм хэмжээг эвддэг гэдгээрээ танигдсан Трампын хувьд ч ер бусын мэдэгдэл болсон бөгөөд Цагаан ордны зүгээс үүнийг одоогоор баталгаажуулаагүй байна.

Флорида дахь өөрийн гольфын клубт байхдаа Трамп сошиал хуудсандаа "Аугаа Дана Уайт, ширүүн тулаанч, дайчин”-д Бүгд Найрамдах намын ерөнхийлөгчийн хэвлэлийн төлөөлөгч болох санал тавьснаа бичжээ.

Тэрбээр Дана Уайтаас UFC-ийн хэд хэдэн тулаанчийг "туслах"-аараа дагуулж ирэхийг хүссэн бөгөөд "Бидэнд 'галзуу зүүнийхэн'-ээс өөрсдийгөө хамгаалахын тулд эдгээр хүмүүс хэрэгтэй байна. Дана бол урьд өмнө байгаагүй өвөрмөц хэвлэлийн төлөөлөгч байх болно. Дана, энэ ажлыг хүлээж аваач!" хэмээн нэмж бичсэн байна.

Трампын энэхүү мэдэгдлийн талаар Цагаан ордон ямар нэг тайлбар өгөөгүй юм.

Бямба гарагт Дана Уайт боксын арга хэмжээнд оролцохоор Лондон хотод байсан бөгөөд UFC-ийн хэвлэлийн төлөөлөгч ч мөн тайлбар авах хүсэлтэд хариу өгөөгүй байна.

UFC-ийн тэргүүн Трампын мэдэгдлийг өөрийн сошиал хуудсанд хуваалцсанаас гадна Цагаан ордны хэвлэлийн танхимын индэр дээр зогсож буй зургаа нийтлээд дээр нь "Дараагийн бүлэг рүү" гэсэн тайлбар бичжээ.

Трампын энэхүү мэдэгдэл нь түүний засаг захиргаа томоохон өөрчлөлт шинэчлэлтийн үеийг туулж, Мягмар гарагт болсон Конгрессын завсрын сонгуульд нам нь хүнд ялагдал хүлээсний дараа гарч байна.

Ардчилсан Намын нэр дэвшигчид олон тойрогт, тэр дундаа Бүгд Найрамдах Намынхан олон арван жилийн турш хяналтаа хадгалж ирсэн бүс нутгуудад түүхэн ялалт байгуулснаар ерөнхийлөгчийн нам Конгрессын хоёр танхимын аль алинд цөөнх болсон юм.

Баасан гарагт Трамп өөрийн олон жил ажилласан зөвлөх Сюзи Уайлсыг (түүнийг ерөнхийлөгчийн гэнэтийн шийдвэр, сэтгэл хөдлөлийг тогтоон барьдаг гол хүн гэж үздэг байсан) албан тушаалаас нь чөлөөлж, оронд нь туслах Стивен Миллерийг тамгын газрын даргаар томилсноо зарласан юм.

Стивен Миллер нь Трампын засаг захиргааны цагаачлалын хатуу бодлогыг боловсруулсан гол хүн, Трампын хамгийн үнэнч тойрон хүрээлэгчдийн нэг гэгддэг.

Трамп өмнө нь хэвлэлийн төлөөлөгчөөрөө Кэти Закариа хэмээх залуу бүсгүйг сонгосон ч тэр нэлээд дуулианд холбогдож, ердөө таван өдөр ажилласны дараа халагдаж байв.

Түүнээс хойш хэвлэлийн төлөөлөгчийн албан тушаал эзэнгүй хэвээр байгаа.

Трамп, Уайт хоёр дотно найзууд бөгөөд 2025 оны нэгдүгээр сард Цагаан ордонд дахин ирснээсээ хойш тэр Уайттай хамт UFC-ийн хэд хэдэн арга хэмжээнд оролцсон юм.

Трамп бас зургаадугаар сард Америкийн тусгаар тогтнолын 250 жилийн ой болон өөрийнхөө 80 насны төрсөн өдрийг тэмдэглэх хүрээнд Цагаан ордны цэцэрлэгт UFC-ийн тулааныг зохион байгуулж байлаа.

Тэр үед ерөнхийлөгчийн өргөөний ойролцоо гэрэл, дууны тоног төхөөрөмж, том дэлгэцүүдээр тоноглогдсон сансрын хөлөг мэт харагдах "The Claw" (Сарвуу) хэмээх төмөр нуман байгууламжийн дор "Октагон" буюу найман талтай тулааны дэвжээ барьсан байв.

Үүниг Уайт "Энэ үнэхээр гайхалтай туршлага байлаа, дахин давтагдашгүй үйл явдал боллоо" гэж хэлж байжээ. Уайт бас 2016, 2020, 2024 онуудад болсон Бүгд Найрамдах Намын үндэсний их хурлууд дээр үг хэлж байсан юм.

Эх сурвалж: Associated Press