Хувь хүний эмх цэгц, хандлага санхүүгийн байдалд нь шууд нөлөөлдөг

Халаасанд чинь нугаларч үрчийсэн мөнгө байгаа юм биш биз?

Хариулт мөнгөө яаран хайш яаш халаасалснаа мартаад мөнгийг элэгдэж муутгах, бүр цаашлаад хэрэглэх боломжгүй болгоход хүргэдгийг бид тэр бүр анзаараад байдаггүй. Гэтэл энэ нь эдийн засагт ямар их хохирол авчирдгийг, тэр бүрт таны төлсөн татварын мөнгөнөөс урсаж байдгийг ч бид мэддэггүй.

Та өөрийгөө мөнгөн дэвсгэрттэй хэрхэн харьцаг хүн гэдгээ бодож үзсэн үү? Мөнгөнд хүндэтгэлтэй хандаж зохистой хэрэглэх нь хувь хүний төлөвшил, хүмүүжил, хандлагатай холбоотой байдаг ажээ.

Их Британийн BBC агентлагийн нийтлэлд дурдсанаар хувийн зохион байгуулалт сайтай, нямбай хүмүүс мөнгөтэй харьцахдаа ч хэтэвчиндээ эмх цэгцтэй хадгалж байсан ба энэ нь тухайн хүмүүсийн санхүүгийн байдалд нь эерэг нөлөө авчирч байгааг баталжээ. Харин эсрэгээрээ амьдралын буруу хэвшилтэй, тогтвор суурьшилгүй, буруу хандлагатай нэгэн мөнгөнд ч мөн адилхан ханддаг ба базаж үрчийлгэж халаасалсан, урагдаж тасарсан, дээр нь шингэн зүйл асгаснаас өнгө, будганд нь өөрчлөлт орсон зэрэг ялгаа ажиглагдсан байна.

Мөнгөнд хандах янз бүрийн хандлага бий. Хамгийн чухал зүйлсийн нэг гэж үзэх нэгэн байхад тийм ч чухал биш гэж үздэг нь ч байна. Амьдралыг мөнгөөр хэмжихгүй ч таныг тайван байлгах, илүү аз жаргалтай байхад зайлшгүй туслах зүйл гэдэг нь өнөөгийн нийгэмд гарцаагүй үнэн билээ. Аливаа зүйлд та ямар хандлага гаргана, тийм л хариуг хүртдэг.

Тиймээс та санхүүгээ төдийгүй өдөр тутмын амьдралаа ямар байлгахыг хүсэж байна, эхлээд хандлагадаа яг л тийм өөрчлөлт оруулаарай.

Мөнгөний талаарх зарим сонирхолтой баримтууд:

Бэлэн буюу цаасан мөнгийг үнэндээ цаасаар хийдэггүй ба хөвөн даавуу, зотон ашигладаг байна.
2.6 жил гүйлгээнд эргэлддэг 1,000 төгрөгийн дэвсгэрт хамгийн богино насжилттайд тооцогддог бол 10,000, 20,000 төгрөгийн дэвсгэртүүд хамгийн урт насжилттайд тооцогддог.
1 ам.доллар хамгийн бага буюу 18 сарын насжилттай бол 100 ам.доллар хамгийн их буюу 9 жилийн настай. Харин зоосон мөнгийг 30 жилийн турш хэрэглэх боломжтой гэж үздэг.
Дэлхий дээрх бүх мөнгөний ердөө 8 хувь нь бэлэн мөнгө. Харин үлдсэнийг нь дижитал төлбөр тооцоо эзэлж байна.