Нийтийн тээврийн салбарын инженер, техникийн ажилтнуудын мэргэжлийн ур чадвар, мэдлэг, туршлагыг сорьсон “YUTONG TECHNIC 2026” засвар үйлчилгээний ур чадварын тэмцээн амжилттай өндөрлөж, шилдгүүдээ тодрууллаа.

Тэмцээний байгууллагын нийлбэр дүнгээр “Зорчигч тээвэр дөрөв” ОНӨААТҮГ-ын баг 458 оноо авч, дэд байр эзэллээ. Энэхүү амжилт нь байгууллагын инженер, техникийн ажилтнуудын мэргэжлийн ур чадвар, багаар ажиллах чадвар, техникийн бэлтгэл хангалтын түвшинг харуулсан үр дүн боллоо.

Байгууллагын нийлбэр дүнгээр “Сутайн буянт” ХХК 474 оноогоор тэргүүн байр, “Зорчигч тээвэр дөрөв” ОНӨААТҮГ 458 оноогоор хоёрдугаар байр, “Зорчигч тээвэр хоёр” ОНӨААТҮГ 430 оноогоор гуравдугаар байр, харин “Авто терминал трейд” ХХК 405.5 оноогоор тусгай байр эзэлсэн байна.

Мөн оролцогчдыг хувийн оноогоор шалгаруулахад “Зорчигч тээвэр хоёр” ОНӨААТҮГ-ын Нямдорж 240 оноогоор тэргүүн байр, “Сутайн буянт” ХХК-ийн Мөнгөнхүү 239.5 оноогоор хоёрдугаар байр, тус байгууллагын Эрдэнэзаяа 234.5 оноогоор гуравдугаар байр тус тус эзэллээ.

“YUTONG TECHNIC 2026” тэмцээн нь нийтийн тээврийн үйлчилгээ үзүүлэгч байгууллагуудын инженер, техникийн ажилтнууд мэргэжлийн ур чадвараа сорихын зэрэгцээ харилцан туршлага солилцох, техникийн үйлчилгээ, засварын чанар, аюулгүй ажиллагааг сайжруулахад чиглэсэн ач холбогдолтой арга хэмжээ боллоо.

“Зорчигч тээвэр дөрөв” ОНӨААТҮГ-ын баг байгууллагын нийлбэр дүнгээр дэд байр эзэлсэн нь манай инженер, техникийн ажилтнуудын мэдлэг, ур чадвар, хамтын ажиллагааны бодит үр дүн бөгөөд цаашид техникийн найдвартай ажиллагаа, засвар үйлчилгээний чанарыг улам сайжруулах урам өгсөн амжилт боллоо.

Тодруулбал, энэ удаагийн тэмцээнд нийтийн тээврийн үйлчилгээ үзүүлэгч 11 байгууллагын 22 инженер технинкийн ажилтан ур чадвараараа өрсөлдсөн юм. Тэмцээнд амжилттай оролцсон нийт инженер, техникийн ажилтнууддаа баяр хүргэж, цаашдын ажилд нь өндөр амжилт хүсье.