Өнгөрсөн парламентад олигтойхон хуцдаг нохой хүртэл МАН-аас нэр дэвшвэл сонгогдож байв. Тэдний нэг болох УИХ-ын гишүүн Л.Энхболд гэгч говийн хүний нүнжиггүй нэгэн эр Өмнөговиос сонгогдож төрийн түшээ болсон ч өөдгүй хуншгүй нэгэн болохоо өнгөрсөн хугацаанд харуулаад амжсан билээ.
Тэрээр УИХ-ын чуулганы танхимд бусдыг “хулгайч худалчаар” нь дуудаж суудаг байсан ч үнэн хэрэгтээ өөрөө жинхэнэ мэргэшсэн хулгайч, залилагч болох нь илэрсэн юм. Л.Энхболд жижиг дунд үйлдвэрлэгч нарт очих ёстой мөнгөнөөс тэрбум тэрбумаар нь хумсалсан увайгүй этгээд. Охин Э.Мандухайнхаа нэр дээр “Мэйт экспорт интернэшнл” компани байгуулан, улмаар 2016 оны арванхоёрдугаар сарын 21-ний өдөр Жижиг дунд үйлдвэрийг хөгжүүлэх сангаас 1.3 тэрбум төгрөгийн зээл авсан нь баримтаар нотлогдсон байдаг. Гэвч түүний залилан луйвар үүгээр дуусаагүй. Тэрээр охиныхоо нэрээр улсын мөнгөнөөс тэрбумаар нь хулгайлчихаад өөрөө хожим хэргээс цэвэрхэн сугарахын тулд олон жил өөрт нь итгэж, үнэнчээр дагаж явсан туслах залуугаа хэрэгт түлхсэн байдаг. Л.Энхболд охиныхоо зээл авсан “Мэйт экспорт интернэшнл” компанийг 2017 оны арваннэгдүгээр сарын 24-ний өдөр Э.Чагнаасүрэнгийн нэр дээр шилжүүлжээ. Амьхандаа охиноо өөрийнхөө луйврын ажиллагаанаас хөндийрүүлж байгаа арга ядсан царай нь энэ бололтой. Түүний ЖДҮХС-аас зээл авсан хэрэг нь сөхөгдөнгүүт зээл авсан хамсаатнуудыг АТГ-аас баривчлан шалгасан байдаг. Энэ үеэр түүнтэй олон жил ажиллаж, итгэж явсан Э.Чагнаасүрэнг баривчилжээ. Тэрээр Л.Энхболдын үүсгэн байгуулсан “Ирээдүй инвест” Банк бус санхүүгийн байгууллагад нягтлан бодогчоор ажилладаг байсан бөгөөд сүүлийн үед туслах, зөвлөхийн ажлыг нь хийж байжээ. Нэг үгээр түүнд олон жил морь нохой мэт зүтгэсэн нэгэн. 2016 онд Л.Энхболдыг УИХ-ын сонгуульд нэр дэвших үеэр 1.5 сая төгрөг хандивлаж, улмаар Л.Энхболдыг УИХ-ын гишүүн болоход нь сонгуулийн ажиллагаанд зүтгэсэн, хандив өргөсөн шанд гишүүний туслахаар нь ажиллах болжээ. Гэтэл Л.Энхболд энэ олон жил өөрт нь итгэж явсан нөхрөө шууд л хэрэгт түлхэж, “Чи миний өмнөөс хэрэг үүрчих, би ялгүй гаргаж өгөхийг хөөцөлдье” хэмээн ятгах болжээ.
Тэр ч байтугай ЖДҮХС-гаас зээл авахдаа Э.Чагнаасүрэнгийн өндөр настай аав ээжийнх нь орон байрыг барьцаанд тавьсан байжээ. Ийнхүү туслахынхаа аав ээжийг ч орон гэргүй болгож, өөрийг нь шоронд явуулахаар санаархсан байна. Харин байдал бишдэж байгааг мэдсэн Э.Чагнаасүрэн 72 цаг саатуулагдахдаа хэргээ задалж, үнэнийг илчилжээ.
Энэ дагуу АТГ, Улсын мөрдөн байцаах газраас хэргийг дахин задлан мөрдөн шалгаж, хэргийн эзэн болох Л.Энхболдыг Х тайлантай компанийн нэр дээр ЖДҮХС-гаас удаа дараа зээл авч, бусдад өрөө барагдуулсан болохыг олж тогтоосон байдаг. Мөн өөрийн эзэмшлийн банк бус санхүүгийн байгууллагаараа өндөр хүүтэй зээл гаргаж, ашиг орлого олсон нь ч тогтоогджээ. Гэвч тэрээр туслах залуугаа удаа дараа ятгаж, “Чи миний өмнөөс хэрэг үүрчих, би албан тушаалтай болж байгаад чамайг ялгүй гаргаж өгнө, би удахгүй “Эрдэнэс монгол” компанийн дэд захирлаар томилогдох гэж байгаа, тиймээс чи миний өмнөөс ял үүрчих” гэж ятгаж эхэлжээ. Уг нь тэрээр өнөөдөр ЖДҮХС-г цөлмөсөн хэрэгтээ ял авч, шоронд сууж байх ёстой. Гэтэл ямар шалгуураар МАН увайгүй луйварчин нөхөрт албан тушаал амлаад сууж байгаа нь хачирхалтай. Хийсэн хэргээ бусдад тохчихоод цэвэрхэн мултрахыг санаархаж яваа Л.Энхболд “Эрдэнэс монгол” ХХК-ийн дэд захирал болбол төрийн мөнгийг идэж уухыг үзүүлж өгөх байх даа.
Түмэн.мн
