АНУ-ын Уисконсин муж өнгөрсөн долоо хоногт саарал чонын тоо толгойг хязгаарлах зорилготой 2021 оны ан авыг зохион байгуулжээ.

Төлөвлөгөө ёсоор долоо хоногийн дотор 119 чоно авлах зөвшөөрөл олгоод байсан ч анчид эхний гурван өдрийн дотор 216 чоно авлаж, төлөвлөгөөг 82 хувиар хэтрүүлсэн байна.

Тиймээс мужийн захиргаа шуурхай арга хэмжээ авч, ан хийх зөвшөөрөгдсөн хугацааг дөрвөн өдрийн өмнө дуусгажээ.

Уисконсин муж энэ жил нийт 200 чоно авлах зөвшөөрөл гаргасан юм байна. Үүний 81-ийг нь нутгийн уугуул индиан овгийнхон, 119-ийг мужийн анчид авчээ. Индианчууд чоныг ариун амьтан гэж үздэг тул авлах биш, хамгаалах зорилгоор зөвшөөрөл аваад ашиглалгүй орхидог.

Америкийн байгаль хамгаалагчид, амьтны эрхийг хамгаалагчид саарал чоныг хэтрүүлэн авлах боломж олгосон Уисконсин мужийн захиргаанд эсэргүүцэл илэрхийлсэн байна.

Агнахыг нь хориглодоггүй байсны улмаас тус муж 1950-аад оны үед ганц ч чоногүй болж байсан түүхтэй. 

1973 онд АНУ-ын холбооны засаг захиргаа мөхлийн ирмэгт байгаа амьтдын төрөл зүйлийг хамгаалах хууль гаргаснаар тоо толгой нь өссөн юм. АНУ даяар 1970-аад оны үед байгаль дахь саарал чонын тоо 1,000 орчим байсан бол өнөөдөр 48 мужийн нутагт нийт 6,000 орчим бий гэсэн тоо гарчээ. Уисконсин мужид энэ үеэр хөрш Миннесота мужаас саарал чонын сүрэг ирж нутагласан гэнэ. 

2012 оноос эхлэн саарал чоныг хамгаалах амьтдын жагсаалтаас гаргасан тул Уисконсин муж жил бүр тоо толгойг нь цөөрүүлэх ан зохион байгуулдаг болсон байна. Тухайлбал 2012 онд 117, 2013 онд 257, 2014 онд 154 чоно авлаж байжээ.

АНУ-ын холбооны шүүх 2014 онд саарал чоныг ховордсон амьтдын жагсаалтад буцааж нэмэх шийдвэр гаргаснаар авлалт зогссон юм. Гэвч 2020 оны аравдугаар сард Дональд Трампын засаг захиргаа саарал чоныг дахин жагсаалтаас хассанаар жил бүрийн авлалт сэргэжээ.

Одоо Америкийн байгаль хамгаалагчид уг шийдвэрийг цуцлуулахаар ажиллаж байна.