Монгол Улсад нисэх хүчин үүсэж хөгжсөний 96 жилийн ой, Агаарын тээвэрчдийн баярын өдрөөр иргэний нисэхийн салбарын ажилчдын хүүхдүүдэд зориулан бүтээн байгуулсан хүүхдийн цэцэрлэг үүдээ нээлээ.
Аливаа байгууллагын боловсон хүчин, мэргэжилтэй ажилчид тухайн салбартаа үр бүтээлтэй, сэтгэл зүрх, мэдлэг чадвараа зориулан хөдөлмөрлөхөд нийгмийн асуудлыг хэрхэн шийдвэрлэсэн нь чухал үр нөлөөтэй байдаг. Ялангуяа хотын төвөөс зайдуу оршдог, ажилдаа очих, буцахдаа багагүй цаг хугацааг замд өнгөрөөдөг иргэний нисэхийн салбарын бага насны хүүхдүүдтэй ажилчдад хүүхдээ харж хандах асуудал хүндрэлтэй байдаг. Тиймээс ИНЕГ-ын Даргын зөвлөл энэ асуудлыг шийдвэрлэх үүднээс салбарын ажилчдынхаа хүүхдүүдэд зориулсан цэцэрлэг барих асуудлыг 2019 онд эхлүүлсэн бөгөөд өнгөрсөн оны 4 дүгээр сард шав тавьж ажлыг нь эхлүүлсэн хүүхдийн цэцэрлэг өнөөдөр нээлтээ хийсэн юм.
ИНЕГ-ын дарга Л.Бямбасүрэн цэцэрлэгийн нээлтэд хэлсэн үгэндээ, нийгмийн хариуцлагын хүрээнд ажилчдынхаа нийгмийн асуудлыг шийдвэрлэх үүднээс тус цэцэрлэгийг барих хөрөнгө оруулалтын асуудлыг шийдэж, салбарынхандаа 96 жилийн ой дээр нь бэлэг барьсандаа баяртай байгаагаа онцлоод дэлхий нийтийг хамарсан цар тахлын аюулаас болж хүнд байдалд байгаа нисэхийн салбар эргэн сэргэх үед дахин 1 цэцэрлэг нэмж барихаар төлөвлөж байгаагаа дуулгалаа. Мөн ажилчдынхаа эрүүл чийрэг байх, дасгал хөдөлгөөн хийх нөхцөл бололцоог нь хангах үүднээс барьж байгуулж буй иж бүрэн Спорт цогцолборын барилгыг ирэх 7 дугаар сард хүлээн авахад бэлэн болж буйг дуулгаад, эдгээр бүтээн байгуулалтыг хийж хэрэгжүүлэхэд гар бие оролцсон бүх хүмүүст талархал илэрхийллээ.
Ирээдүйн нисэхийн өндөр мэргэжлийн боловсон хүчнүүд төлөвшин өсч хүмүүжих 210 ортой хүүхдийн цэцэрлэг нь Хан-Уул дүүргийн 49 дүгээр цэцэрлэгийн Буянт-Ухаа салбар болж ажиллах юм. Эх орон, ард түмнийхээ өмнө хүлээсэн үүргээ нэр төртэй биелүүлж буй иргэний нисэхийн салбарынхан 96 жилийн ойн баяраараа нисэхийн жаалуудаа хүмүүжүүлэх цэцэрлэгтэй болсондоо баяртай байна.
