НҮБ-ын Хөгжлийн Хөтөлбөрийн хэрэгжүүлж буй “Байгаль орчны засаглал” төслийн хүрээнд байгаль орчны мониторингын “Ногоон титэм” ХХК-ийн боловсруулсан “Туул голын сав дагуух түгээмэл тархацтай ашигт малтмал олборлосон газрыг нөхөн сэргээх аргачлал”-ыг танилцуулах, тус аргачлалын дагуу загвар нөхөн сэргээлтийн үзүүлэх сургуулилт 2021 оны 10 дугаар сарын 26-ны өдөр зохион байгуулагдлаа.
Уг сургалтанд Улаанбаатар хот, Төв аймгийн ойр орчимд түгээмэл тархацтай ашигт малтмалын олборлолт явуулж буй аж ахуйн нэгжүүд, Элс, хайрга, дайрга үйлдвэрлэгч компаниудын холбоо, нийслэл, орон нутгийн байгаль орчин, мэргэжлийн хяналтын байгууллагуудын холбогдох албан тушаалтнууд хамрагдлаа.
Сургалтын зорилго нь Монгол улсад хэрэгжиж буй уул уурхайн нөхөн сэргээлтийн талаарх хууль, дүрэм журам болон Байгаль орчин, ногоон хөгжлийн сайдын 2015 оны А-138 тушаалаар батласан “Уул уурхайн улмаас эвдрэлд орсон газарт техникийн болон биологийн нөхөн сэргээлт хийх аргачлал”, MNS 5917:2008, “Уул уурхайн үйлдвэрлэлийн үйл ажиллагаагаар эвдэрсэн газрын нөхөн сэргээлт, Техникийн ерөнхий шаардлага” стандартуудын хэрэгжилтийг сурталчлах, Түгээмэл тархацтай ашигт малтмал олборлосон ордуудад дээрх стандарт аргачлалыг хэрхэн ашиглах талаар онолын болон практик мэдлэгийг олгох юм. Сургалтаар мөн түгээмэл тархацтай ашигт малтмалын чиглэлээр үйл ажиллагаа явуулж буй аж ахуйн нэгжүүдэд гарч буй нийтлэг алдаа дутагдалын талаар Мэргэжлийн хяналтын байгууллагаас танилцуулга хийсэн бөгөөд тухайн аж ахуйн нэгжүүд нь ТЭЗҮ, Уулын ажлын төлөвлөгөөний дагуу ажилладагүй, мөн нөхөн сэргээлтийн зардлыг багаар төлөвлөх түүнчлэн маркшейдер болон байгаль орчны мэргэжлийн ажилтан байхгүй зэрэг зөрчлүүд түгээмэл байгаа талаар танилцууллаа. Мөн дүйцүүлэн хамгааллыг Байгаль орчинд нөлөөлөх байдлын нарийвчилсан үнэлгээ болон тухайн жилийн Байгаль орчны мененжментийн төлөвлөгөөнд заавал тусгасны үндсэн дээр хийх шаардлагатай талаар онцлон дурдлаа.
Мөн сургалтад оролцогчид Хан-Уул дүүргийн 14 дүгээр хорооны нутаг дэвсгэрт түгээмэл тархацтай ашигт малтмалын ашиглалтын тусгай зөвшөөрөл эзэмшигч “Очирням” ХХК-ийн эвдэгдсэн талбайд хийж гүйцэтгэсэн нөхөн сэргээлтийн талбайтай газар дээр нь очиж танилцсан бөгөөд нөхөн сэргээлтийн арга аргачлалын талаар санал солилцож, туршлага судаллаа.
Газрын хэвлийн техникийн болон биологийн нөхөн сэргээлт хийсэн талбай
Газрын хэвлийн техникийн нөхөн сэргээлт хийж буй талбай
Нийслэлийн Байгаль орчны газар
