Хөгжлийн банкнаас олгосон чанаргүй болсон гэх хамгийн том 10 зээлдэгчийн компани, зээлүүдийн хэмжээг сонирхуулъя. Хамгийн эхэнд "Хөтөл" ХХК 295 тэрбум болон нэмэх нь "QSC" ХХК-ийн авсан 213 тэрбум хүрч, энэ зээлдэгчдийг "манлайллаа". Тус хоёр компаний цаад эзэн нь Худалдаа хөгжлийн банк болон "Улаанбаатар" банкны эзэн Д.Эрдэнэбилэг гэж үздэг. Хачирхалтай нь хамгийн том банкны эзэн хамгийн МУУ ЗЭЭЛДЭГЧ болчихоор энгийн иргэд нь яах юм бол...

Төрийн орон сууцны корпораци хэд хэдэн удаа Хөгжлийн банкнаас зээл авчээ. Одоо 118 тэрбум төгрөгийн зээлийн асуудал яригдаж байна. ТОСК-ийн эцсийн өмчлөгч нь төр. Төр хамгийн муу менежер гэдэг нь энэ болов уу.

Хөгжлийн банкнаас зээлдэгчдийн дотроос хамгийн их нэр нь дуулдаж байгаа газар бол "Бэрэн" ХХК. Тус компани 115 тэрбумын зээлтэй гэнэ. Ардчиллын засгийн үед буюу 2012-2016 онд мандаж явсан тус компанийг ардчиллын лидерүүд, тэрчлэн сүүлдээ МАН-ын "ловон" Бадамжунайтай холбоод байхаад бодоход МАНАН бүлэглэлийн ивээлд орсны ач байх.

Нэг үе УИХ-ын гишүүн, Батлан хамгаалахын сайд байсан Б.Эрдэнэбатын "Эрэл" ХХК 106 тэрбум төгрөгийн зээлтэй. "Монполимет" 113 тэрбумын зээлтэй гэсэн байна.

Капитал банк 55 тэрбум, Монгол мах экспо 38 тэрбум, "Монгол эм импекс" ХХК 4,6 тэрбумын зээл авсан байна. Эдгээргурван компанийг нэг эзэнтэй хуулийн этгээд гэж үздэг. Капитал банк гэхээр эзэн нь хэн болох нь тодорхой биз ээ.

Тэрчлэн НВЦ компани 74 тэрбум, "Ачлал трейд" 52 тэрбум, "Монгол драй милк" 49 тэрбумын зээлийн асуудал сөхөгдөж байна.

Тэрчлэн эхнээсээ хэл амтай, нутгийн иргэдийн эсэргүүцэлтэй тулж буй "Эгийн голын усан цахилгаан станц" гэхэд Хөгжлийн банкнаас 43 тэрбумын зээлтэй гэсэн тооцоо гарчээ. Эдгээр 10 зээлдэгч компани зээлээ төлчихвөл 1,3 их наядын орлого төвлөрнө.

Сайн муу зэрэгцэн байдаг хойно. Хөгжлийн банкны зарим зээлдэгчид зээлээ төлж, хааж байна.

Хамгийн түрүүнд УИХ-ын гишүүн Ц.Анандбазарын "Содмонгол" компани зээлийн үлдэгдлээ бүрэн төлж хаасан байна. Энэ нь 4 тэрбум орчим төгрөг. Мөн 3 тэрбум гаруй төгрөг төлж, "Вояжер минерал" зээлээ бүрэн төлж хаажээ. Одоо зээлээ төлсөн компаниуддаа баяр хүргэе гэж байна. Баяр хүргэх биш, тэд төлөх ёстой өрөө төлсөн, нэг үгээр хийх ёстой, үүрэгт ажлаа хийсэн. Үүний төлөө баяр хүргэх тийм ч зохимжтой бус биз ээ.

Мөн "Макс"-ын Ганбаатарын гэх "Макс рөүд" компани нэг өдөр 17 тэрбумын зээлээ бүрэн төлж хаасан сайхан мэдээтэй. Гэхдээ Хөгжлийн банкны асуудал өндрөө аваагүй бол 17 тэрбумаа байсаар атал өгөхгүй гудсан дороо хадгалаад явах байсан уу, байсаар байтал зээлээ төлөхгүй, яасан бэртэгчин юм бэ гэсэн нэг гомдол хүмүүст төрж байгаа нь нууц биш.