Энэ оны эхний ээлжийн газрын цахим дуудлага худалдаа зохион байгуулагдаж, нийслэлийн төсөвт 923.4 сая төгрөг төвлөрүүлэхээр болсон талаар Нийслэлийн газар зохион байгуулалтын алба мэдээллээ.

Дуудлага худалдаанд зарлагдсан нийслэлийн 19 байршлаас 12 байршилд нь ялагч тодорсон байна. Нийт 17.5 га газраас 9.48 га газрыг газрын биржийн цахим системээр худалдаалжээ.

Харин хоёр болон гурван ээлжийн газрын цахим дуудлага худалдаа ирэх сарын 6, 27-ны өдрүүдэд зохион байгуулагдахаар товлогдсон байна. 2022 онд нийт таван удаагийн дуудлага худалдаагаар 94 байршилд газар эзэмшүүлэх, ашиглуулах эрх худалдахаар төлөвлөснийг Нийслэлийн газар зохион байгуулалтын алба мэдээллээ. Үүнд нийт 138 га газар багтаж байгаа аж.

2021 оны IV улирлын байдлаар гэр бүлийн зориулалттай газрын дундаж үнэ нэг метр квадрат нь 71.2 мянган төгрөг хүрч, өмнөх оны мөн үеэс 70 хувиар өсжээ.

Харин үйлдвэрлэл, аж ахуйн зориулалттай газрын дундаж үнэ нэг метр квадрат нь 194 мянган төгрөг болж, 31 хувиар өссөнийг “Тэнхлэг зууч” мэдээллээ.